Shkup, 16 dhjetor 2024 (MIA) - Në Ministrinë e Shëndetësisë bëhen analiza për punën e drejtorëve të institucioneve të shëndetit publik në vend. Ministri Arben Taravari thotë se nevojitet kohë që të komunikohet se kush nuk punon siç duhet dhe të lavdërohen ata që e meritojnë.

Në pyetjen e gazetarëve se sa është i përmbushur nga puna e drejtorëve të ISHP-së dhe nëse do të ketë ndryshime, Taravari u përgjigj se ka "drejtorë perfektë, të shkëlqyer, shumë të mirë, të mirë dhe drejtorë të dobët".

"Sa herë që bëni një përzgjedhje prej 150 drejtuesish në institucionet shëndetësore publike, disa do të jenë shumë të mirë, disa do të jenë të dobët. Ne si Ministri e Shëndetësisë analizojmë performancën e drejtorëve dhe është normale që aty ku menaxhimi nuk bëhet siç duhet të bëjmë ndryshime. Por më lejoni kohë që të kemi bazat dhe faktet për disa nga drejtorët që në përgjithësi nuk funksionuan mirë dhe ata që funksionuan shumë mirë dhe perfekt, duhet t'i lavdërojmë dhe përmendim. Dhe tashmë mund të shihni se kur ne shkojmë për të promovuar disa gjëra, ato bëjnë diçka nga asgjëja. Dhe kjo është për t'u lavdëruar", tha Taravari, duke iu përgjigjur pyetjeve të gazetarëve në një eveniment ku u shpall një projekt për avancimin e arsimit në infermieri dhe obstetri.

Në pyetjen sa nga drejtorët e emëruar për punën kanë vlerësim më të dobët, ministri kërkoi kohë për, siç tha, t'i shohë të gjitha të dhënat që i ka përgatitur ekipi në Ministrinë e Shëndetësisë.

"Nuk dua të flas në përgjithësi. Megjithatë, marrim informacione edhe nga punonjësit e shëndetësisë se në disa spitale, qendra shëndetësore dhe klinika ka pakënaqësi që disa drejtorë nuk sillen ashtu siç duhet dhe duhet të jenë drejtues të një ekipi që duhet të funksionojë sa më mirë sepse në fund të fundit fokusi në shëndetësi është te pacientët që duhet të jenë të kënaqur", shtoi Taravari. mb/

Foto: MIA