Shkup, 5 dhjetor 2025 (MIA) - Kryetari i Kuvendit, Afrim Gashi sot u takua me Imamin e Qabesë, Sheikun dr. Mahir Muajkali, i cili ndodhet për herë të parë për vizitë zyrtare katërditore në vend.

Siç njoftojnë nga pres shërbimi i Kuvendit, në takim mori pjesë edhe Reis ul Ulema Shaqir ef. Fetahu, kreu i Bashkësisë Fetare Islame (BFI).

Në atmosferë të përzemërt dhe konstruktive, bashkëbiseduesit trajtuan rëndësinë e vizitës së tij, si dhe rëndësinë e respektit dhe mirëkuptimit të ndërsjellë. Njëkohësisht, u shpreh mirënjohja e sinqertë autoriteteve shtetërore të Mbretërisë së Arabisë Saudite për mbështetjen dhe bashkëpunimin e tyre deri më tani.

Në bisedë, siç thuhet në kumtesë, u theksua edhe rëndësia e forcimit të lidhjeve dhe vlerave që i ndajnë të dy vendet dhe popujt, si dhe gatishmëria e ndërsjellë për të avancuar marrëdhëniet institucionale dhe për të thelluar bashkëpunimin e ndërsjellë. bsh/

Foto: Kuvend