Kajro, 17 qershor 2022 (MIA)- Të paktën gjashtë persona kanë humbur jetën sot në Kajro gjatë rrëzimit të një ndërtese gjashtëkatëshe, njoftuan autoritetet egjiptiane. Ekipet e shpëtimit po bëjnë kërkimet nën rrënoja, ndërsa tani për tani nuk është e njohur se çka ka shkaktuar rrënimin e objektit. Autoritetet besojnë se një familje gjashtëanëtarësh ka qenë në ndërtesën kur ajo është rrënuar mëngjesin e sotëm. Ndërtesa pranë ka mbetur pa pjesën e jashtme të murit. Rrënimi i ndërtesave është punë e zakonshme në Egjipt për shkak të ndërtimit të dobët dhe mirëmbajtjes joadekuate në mjediset e varfra dhe rurale. Qeveria ka tentuar të përballet me ndërtimet e egra në vitet e fundit, pas zbatimit të keq të ligjit me dekada, por ende ka lagje në Kajro me ndërtesa ilegale.