Shkup, 2 mars 2026 (MIA) - Presidentja Gordana Siljanovska-Davkova mbajti fjalim në hapjen e konferencës virtuale 24-orëshe të Women in Tech, një organizatë globale që synon nxitjen e përfshirjes, diversitetit dhe barazisë së grave në profesionet STEM (shkencë, teknologji, inxhinieri dhe matematikë). Siç porositi, gratë nuk janë më përjashtime në proceset teknologjike, por janë krijueset e tyre: mendje kërkimore, themeluese të startapeve, inxhiniere dhe vizionare, të cilat ndërtojnë infrastrukturën e së ardhmes.

 Sipas Siljanovska-Davkovës, nga Sidnei deri në Shkup, nga Berlini deri në Singapor, nga Nju-Jorku deri në Tokio, gratë po flasin, po dëgjojnë, po ndajnë dhe po shkruajnë historinë e tyre të përbashkët globale.

 "Jetojmë në një kohë kur teknologjia po e bashkon planetin më shpejt se kurrë më parë. Në të kaluarën, gjeografia i përcaktonte mundësitë, por sot dija, guximi dhe vizioni i tejkalojnë kufijtë. Në këtë gjeografi të re që krijon teknologjia, nuk ka qendra dhe periferi talentesh, por ide që presin të njihen, të mbështeten dhe të realizohen. Për një kohë të gjatë, shumë gra kanë punuar në heshtje, në mjedise pa përfaqësim të barabartë, në institucione ku duhej ta provonin veten dy herë që puna e tyre të njihej. Sot, falë këmbënguljes dhe vizionit të tyre, gratë nuk janë më përjashtime në botën e teknologjisë. Ato janë mendje kërkimore, themeluese të startapeve, drejtore të kompanive, programuese, inxhiniere, dizajnere, vizionare. Ato po krijojnë infrastrukturën e së ardhmes: nga inteligjenca artificiale te platformat digjitale që lidhin njerëzit dhe ekonomitë", theksoi presidentja.

 Ky trend global, shtoi, kujton një të vërtetë të padiskutueshme, se suksesi në botën moderne nuk është një garë individuale, por se çdo përparim bazohet në njohuri të përbashkëta, përvoja të mëparshme dhe mbështetje të ndërsjellë.

 U përqendrua edhe në solidaritetin dhe mbështetjen e grave, të cilat, tha, janë të nevojshme për të lidhur njohuritë me vizionin e një bote tjetër - një botë të udhëhequr nga paqja, toleranca, barazia, në vend të nevojës mashkullore për dominim dhe superioritet.

 Në fjalim, Siljanovska-Davkova e përshkroi konferencën si "një vijë të padukshme që lidh botën nga një zonë kohore në tjetrën, nga një kontinent në tjetrin", duke theksuar se nëse dikur gjeografia përcaktonte mundësitë, sot dija dhe guximi i tejkalojnë kufijtë.

 Konferenca 24-orëshe u zhvillua dje, duke lidhur mijëra gra nga kontinente të ndryshme, të cilat përmes dijes, përvojës dhe solidaritetit po shkruajnë një histori të përbashkët globale të grave.

 Foto: Arkivi i MIA-s