Shkup, 24 tetor 2025 (MIA) - Gjykata Themelore Penale në Shkup shtyu seancën e sotme gjyqësore në të cilën duhej të shpallej vendimi kundër 25-vjeçarit nga Shkupi, F.L., i cili më 1 korrik të këtij viti, duke drejtuar një motoçikletë "Kavasaki" pa patentë shoferi në një shteg për këmbësorë në kejin e Vardarit, pranë Parkut të Frankofonisë, e ka përplasur Jugoslav Nikollovskin (68) dhe është larguar nga vendi i ngjarjes.

Siç informoi Gjykata, seanca u shty për shkak të mungesës së të pandehurit, i cili për shkak të një virusi të barkut, në mëngjes, para fillimit të gjykimit përfundoi me infuzion.

Prokuroria e akuzon personin për krime të rënda kundër sigurisë së njerëzve dhe pronës në trafik dhe për mosdhënie ndihme një personi të lënduar në një aksident trafiku.

Sipas aktakuzës, i pandehuri po drejtonte një motoçikletë "Kavasaki" në një shteg për këmbësorë, megjithëse nuk kishte patentë shoferi dhe po drejtonte në kundërshtim me rregullat e trafikut. Edhe pse shpejtësia e motoçikletës ishte 35 kilometra në orë, ajo konsiderohet e pasigurt në një vend të destinuar ekskluzivisht për këmbësorë. Për shkak të kësaj, i pandehuri nuk arriti të ndalet në kohë dhe goditi këmbësorin Jugoslav Nikollovski, i cili pësoi lëndime të rënda trupore. Bashkëudhëtari në motoçikletë u lëndua gjithashtu.

Në aktakuzë thuhet se në vend që të ofronte ndihmë, i pandehuri është larguar nga vendi i aksidentit, duke e lënë motoçikletën pas. Këmbësori është dërguar në Qendrën e Emergjencës në Shkup, ku më vonë ndërroi jetë nga plagët e marra. sa/

Foto: MIA arkivi