Bruksel, 27 qershor 2024 (MIA) - Kryeministri holandez në shkuarje Mark Rute sot deklaroi se pret që marrëveshja e liderëve të BE-së për shpërndarjen e pozitave udhëheqëse të jetë ashtu siç janë dakorduar tre grupet politike në Parlamentin Evropian.

"Pres debate, por tri familjet politike centriste u dakorduan. Mendoj se marrëveshja do të jetë e tillë, por duhet të shohim", deklaroi Rute për gazetarët pas mbërritjes në samitin e liderëve të BE-së në Bruksel.

Ai shtoi se ishte krenar që u zgjodh Sekretar i ri i Përgjithshëm i NATO-s. Gjatë samitit të liderëve të BE-së në Bruksel, krerët e shteteve apo qeverive të vendeve anëtare të BE-së pritet të marrin vendim për ndarjen e pozitave drejtuese në institucionet evropiane pas zgjedhjeve të Parlamentit Evropian.

Liderët e BE-së gjatë samitit duhet të vendosin se kush do të jetë kryetari i ri i Komisionit Evropian, kush do të udhëheqë Këshillin Evropian dhe kush do të trashëgojë spanjollin Zhozep Borrell si përfaqësuesi i lartë i BE-së për politikën e jashtme dhe sigurinë.

Mbledhja vjen pasi negociatorët nga tre grupe në Parlamentin Evropian - Partia Popullore Evropiane, Social Demokratët dhe Liberalët - ranë dakord të emërojnë kryetaren aktuale të Komisionit Ursula fon der Lajen për një mandat të dytë, ish kryeministrin portugez Antonio Kosta për të qenë kryetar i Këshilli Evropian, dhe kryeministren e Estonisë, Kaja Kalas, për të marrë postin e kreut të diplomacisë evropiane. sa/

Foto: Arkivi i MIA-s