Shkup, 4 nëntor 2024 (MIA) - Zgjidhja është reformë e plotë, departizim i plotë si i Këshillit Gjyqësor ashtu edhe i Këshillit të Prokurorëve Publikë. Rekomandimet e Misionit vlerësues duhet të merren me vëmendjen e duhur dhe serioze, sepse nëse vazhdohet kështu, raporti i ardhshëm i Komisionit Evropian do të jetë negativ ose më i keq se të gjithë të mëparshmit, thonë nga Qeveria për MIA-n.

Në pyetjen se cili është qëndrimi i Qeverisë për Raportin e KE-së në të cilin shënohet se shpërbërja e paralajmëruar e Këshillit Gjyqësor dhe Këshillit të PP-së brengos dhe se nevojiten reforma në pajtim me rekomandimet e Misionit Vlerësues, nga Zyra e zëdhënësit të Qeverisë, thonë se gjithmonë kur ta hapin temën për shpërbërjen e këtyre institucioneve, atëherë "shumica janë të shqetësuar, ndërsa përmes ekspertëve të cilët vite të tëra ishin vasal të LSDM-së dhe BDI-së, i mbrojnë pozitat se kjo nuk mund të bëhet".

"Për fat të keq, sistemi i prokurorisë në Maqedoni është katastrofik dhe shembulli i një gjyqësori të robëruar është praktikisht gjyqësori i Maqedonisë sot. Në këtë moment, shembulli më i përshtatshëm për këto pretendime janë akuzat për partizim brutal të Bordit Drejtues të Akademisë së Gjyqtarëve dhe Prokurorëve Publikë. Andaj konfirmojmë se zgjidhja është reforma e plotë, departizim i plotë si i Këshillit Gjyqësor ashtu edhe i Këshillit të Prokurorëve Publikë dhe sapo të nisin çdo procedurë opinioni do të informohet", thuhet në përgjigjen e Zyrës së Zëdhënësit të Qeverisë.

Gjithashtu, theksojnë se rekomandimet e Komisionit të Vlerësimit duhet të shqyrtohen me vëmendje të plotë dhe serioze sepse të njejtat janë përpunuar nga ekspertë të cilët me analizë të thellë morën rekomandime të tilla, sepse "nëse vazhdojmë kështu raporti i ardhshëm i Komisionit Evropian do të jetë negativ ose më i keq nga të gjitha raportet e mëparshme".

Lidhur me konsultimet e paralajmëruara për reformat e Këshillit Gjyqësor dhe të Prokurorisë Publike, Qeveria për MIA-n thekson se reformat në sistemin e drejtësisë nga një premtim parazgjedhor janë bërë pjesë e programit të qeverisë 2024-2028, konkretisht në kapitullin II-Fondi kundër korrupsionit.

"Qeveria avokon për zgjidhje sistematike, për transformimin e organeve të drejtësisë në institucione reale, transparente, të përgjegjshme dhe efikase. Jemi të përkushtuar seriozisht dhe i qëndrojmë idesë për të sjellë zgjidhje që do të jenë themeli i një shoqërie normale demokratike. Për të sjellë një zgjidhje të qëndrueshme, ne kërkuam diskutim dhe kërkuam gjithëpërfshirje, për të cilën nuk kemi parë një situatë të tillë deri më sot. Pra, nga këtu është mjaft logjike të pyesim nëse ka shumë subjekte të interesuara nga shpërbërja e këtyre institucioneve? Është e rëndësishme të dihet se po vjen koha e ndryshimeve dhe një shans për personel profesional dhe të aftë" thonë nga Zyra e Zëdhënësit të Qeverisë.

Programi për punë i Qeverisë 2024-2028, i dorëzuar në Kuvend nga Hristijan Mickoski, është prezantuar në gjashtë shtylla me mbi 60 faqe. Synimi kryesor, siç u tha, është rikthimi i besimit në institucionet e qeverisjes shtetërore, eliminimi i korrupsionit dhe garantimi i shtetit ligjor, si dhe rigjallërimi ekonomik me synimin për krijimin e vendeve të punës produktive dhe të mirëpaguara. Shtylla e dytë - fronti kundër korrupsionit, parasheh reformën e sistemit gjyqësor dhe luftën sistematike kundër korrupsionit.

"Ligjet do të zbatohen në mënyrë të barabartë për të gjithë qytetarët, pa marrë parasysh përkatësinë e tyre etnike, fetare, gjinore dhe të tjera. Qeveria do të ofrojë zgjidhje të reja sistematike për shndërrimin e organeve të drejtësisë në subjekte vërtet të pavarura, transparente, të përgjegjshme dhe efikase, që janë themeli i një shoqërie normale demokratike. Ai do t'i përkushtohet lirimit të gjyqësorit nga kufizimet e pushtetit ekzekutiv dhe zbatimit të politikave për të zbardhur konfliktin e interesave në gjyqësor, nepotizmin aktual, partishmërinë dhe miqësinë", thuhet në programin e Qeverisë.

Ai parashikon shpërbërjen dhe reformën ligjore të Këshillit Gjyqësor dhe Këshillit të Prokurorëve Publikë. Në një periudhë tranzitore, Qeveria do të iniciojë ndryshime ligjore që do të vendosin kritere strikte dhe objektivisht të matshme që duhet të plotësojnë anëtarët e rinj, të zgjedhur me propozimin e Kuvendit dhe Presidentit të Shtetit, përmes një procedure transparente dhe publike që do të garantojnë integritetin dhe cilësinë e kandidatëve të përzgjedhur. Qeveria do të inicojë procesin e ndryshimit të Kushtetutës në pjesën e rregullimit të përbërjes së Këshillit Gjyqësor dhe Këshillit të Prokurorëve Publikë. sa/

Foto: Arkivi i MIA-s