Shkup, 18 qershor 2024 (MIA) - Qeveria e Republikës së Maqedonisë së Veriut, me kërkesë të Ministrisë së Shëndetësisë, ka dhënë rekomandime lidhur me valën e re të të nxehtit që nga nesër pritet të përfshijë të gjithë shtetin, pasi nga Instituti i Shëndetit Publik dhe alarmi i motit i Institutit për Çështje Hidrometeorologjike janë marrë informacione se nga nesër e deri më 23 qershor (e dielë), i gjithë territori i Republikës së Maqedonisë së Veriut do të përfshihet nga vala e të nxehtit me fazë portokalli.

Në rekomandimet të cilat i miratoi Qeveria në mbledhjen e sotme për uljen e rreziqeve nga temperaturat e larta, parashihet lirim nga detyrimet e punës për grupet më të rrezikuara të popullsisë, gjegjësisht gratë shtatzëna dhe personat mbi 60 vjet, ndërsa në institucionet e kujdesit për fëmijët (kopshtet) të mos praktikohet aktiviteti fizik dhe fëmijët mos nxirren jashtë në periudhën nga ora 11:00 deri në 17:00.

Gjithashtu, Qeveria rekomandon njësitë e vetëqeverisjes lokale, Kryqi i Kuq dhe Qendrat për Çështje Sociale, në rajonet e prekura nga vala e të nxehtit, të ofrojnë ndihmë për personat e vetmuar, të moshuar,  të pafuqishëm, të pastrehë.

Në kumtesën e sotme të Qeverisë shtohet se duke pasur parasysh faktin se disa procese të rrezikshme të prodhimit dhe teknologjisë mund të paraqesin rrezik shtesë për shëndetin e punëtorëve të ekspozuar, rikujtohen punëdhënësit për detyrimin e  respektimit të rregulloreve ligjore të kësaj fushe. fc/

Fotografia: Arkivi i MIA-s