Shkup, 12 prill 2023 (MIA) - Qentë që sulmuan fëmijën tetë vjeçar në lagjen Pintija të Shkupit janë izoluar dhe vënë nën mbikëqyrjen e një veterineri zyrtar. Agjencia e Ushqimit dhe Veterinarisë bën të ditur se qentë janë identifikuar siç duhet me mikroçip. Një veteriner zyrtar do të hetojë rastin dhe do të vlerësojë rrethanat në të cilat ka ndodhur ngjarja.

"Personalisht, si person dhe si drejtor i AUV-it, shpreh keqardhjen më të thellë për tragjedinë në të cilën u shua një jetë e re njerëzore. Nga mbikëqyrja u konstatua se në ngjarjen fatkeqe kanë marrë pjesë dy qen, të cilët kanë pronar. Qentë janë identifikuar siç duhet me një mikroçip dhe tani janë të izoluar dhe të vendosur nën mbikëqyrjen e një veterineri zyrtar. Oborri ku mbahen qentë është i rrethuar siç duhet dhe në hyrje është vendosur tabela paralajmëruese “Kujdes nga qeni”, thotë drejtori i AUV, Nikollçe Babovski.

Me kontrollin do të shqyrtohet gjithashtu nëse pronari i qenve ka respektuar dispozitat e ligjeve për shëndetin veterinar, për identifikimin dhe regjistrimin e kafshëve dhe për kujdesin shëndetësor dhe mirëqenien, përkatësisht nëse janë respektuar kushtet e përcaktuara në Urdhrin aktual vjetor për kujdesin shëndetësor të kafshëve, kushtet për mbajtjen e qenve nga pronari etj. Sipas ligjit, jepet urdhër që qentë të vihen nën vëzhgim zyrtar për sëmundjen e tërbimit nga veterineri për një periudhë 15-ditore dhe pas përfundimit të vëzhgimit lëshohet vërtetimi për mbikëqyrjen e tërbimit, e cila vërteton gjendja shëndetësore e kafshëve në lidhje me sëmundjen.

Dy qentë e racës “mastif anglez” janë të regjistruar edhe në Klubin e Kinologjise. Njëri është e importuar nga Serbia, ndërsa tjetri nga Bjellorusia.

Nga atje thanë për MIA-n se bëhet fjalë për qen të përmasave më të mëdha, të cilët kanë marrë pjesë në ekspozita dhe të cilët janë të edukuar dhe socializuar.

"Bëhet fjalë për qen më të mëdhenj, por vërej se qentë merrnin pjesë në ekspozita, që do të thotë se ata janë të socializuar sepse në ekspozitat e bukurisë qentë duhet të jenë të mirë edukuar dhe të socializuar me kafshë dhe njerëz të tjerë, thotë kryetari i Klubit të Kinologjise, Jordan Hristovski. .

Hristovski i shprehu ngushëllimet familjes së fëmijës dhe apeloi opinionin që të përmbahet nga deklaratat e kota.

Nga “Anima Mundi” për MIA-n deklaruan se do të marrin vendim nëse gjykojnë se ka bazë për këtë në bazë të qëndrimeve zyrtare të institucioneve.

Prokuroria ka njoftuar sot se në vendin e ngjarjes ka dalë një prokurori publik kompetent dhe se po merren masa për shqyrtimin e plotë të rastit.

Sipas dispozitave të Ligjit për Mbrojtjen dhe Mirëqenien e Kafshëve, në lidhje me mbajtjen e qenve të rrezikshëm, pronari ose personi përgjegjës për një qen të rrezikshëm duhet të sigurojë kushte për mbajtjen e kafshës të përshtatshme për racën, nevojat dhe sjelljen karakteristike, duke përfshirë që qenin duhet ta mbajë në një hapësirë të mbyllur ose të lidhur dhe kur e lëviz qenin në zinxhir dhe të vendoset një maskë mbrojtëse mbi të. Qentë e rrezikshëm duhet të shoqërohen nga një i rritur kur lëvizin.

Pronarët e qenve duhet të vendosin një tabelë në derën e hyrjes në oborr në një vend të dukshëm që tregon qartë praninë e një qeni, pavarësisht nëse qeni ose qentë janë të rrezikshëm apo jo. ls/