Shkup, 18 dhjetor 2024 (MIA) - Mbrëmë ambasadori japonez Kazuja Ocuka ka mbajtur një pritje lamtumirëse me rastin e përfundimit të mandatit të tij si ambasador i Japonisë në vend. Në fjalën e tij lamtumirëse, ​​ai theksoi se sot, kur bota po përballet me sfida të mëdha për paqen dhe rendin ndërkombëtar, Japonia dhe Maqedonia e Veriut qëndrojnë dhe kontribuojnë në promovimin e vlerave themelore të përbashkëta si liria, demokracia, të drejtat e njeriut dhe sundimi i ligjit.

Në pritje ishte e pranishme edhe presidentja Gordana Siljanovska Davkova, zëvendësministri për Punë të Jashtme dhe Tregti të Jashtme Zoran Dimitrovski, përfaqësues të trupit diplomatik, të sektorit të biznesit dhe të mediave.

"Këtë vit ne festojmë një përvjetor shumë domethënës - 30 vjetorin e marrëdhënieve tona diplomatike. Me atë rast organizuam mbi 30 ngjarje të mrekullueshme: koncerte, shfaqje filmash, ekspozita dhe punëtori në institucionet kulturore në të gjithë vendin tuaj. Do të doja të falënderoja mbështetësit tanë. Para se gjithash, Ministrinë e Kulturës dhe institucionet kulturore të Maqedonisë. Më tej, miqve tanë nga komuniteti i biznesit, si dhe Shoqatës së rinovuar Maqedono-Japoneze për Miqësi dhe Bashkëpunim", tha Ocuka.

Ai shprehu shpresën se qeveria e re do të forcojë fushatën informuese për të inkurajuar investimet e huaja nga Japonia, duke shtuar se Ekspo në Osaka vitin e ardhshëm do të jetë një mundësi e shkëlqyer për një promovim të tillë.

"Dua të shpreh respektin tim të thellë për këtë vend. Gjatë qëndrimit tim fitova një vlerësim më të thellë të historisë suaj, kulturës, sfidave politike dhe kapacitetit tuaj për të mbajtur marrëdhënie të mira me fqinjët tuaj. Unë e dua këtë vend dhe ju uroj sukses dhe prosperitet në rrugën drejt BE-së", tha Ocuka.

Zëvendësministri i Punëve të Jashtme dhe Tregtisë së Jashtme Dimitrovski, theksoi se Japonia është një nga partnerët më të rëndësishëm të vendit tonë.

Ai theksoi se një aspekt veçanërisht i rëndësishëm i bashkëpunimit tonë është asistenca teknike dhe eksperte nga Japonia. "Përmes përgatitjes së studimeve të rëndësishme zhvillimore që janë kyçe për zhvillimin tonë kombëtar, si dhe përmes specializimit shkencor dhe teknik të ekspertëve tanë në universitetet prestigjioze japoneze, ky bashkëpunim kontribuon drejtpërdrejt në ngritjen e kapaciteteve tona profesionale dhe përshpejtimin e zhvillimit tonë", tha Dimitrovski.

Në manifestimin e mbrëmshëm u prezantua ekspozita kushtuar historisë së miqësisë 30-vjeçare mes Maqedonisë së Veriut dhe Japonisë. sa/

Foto: Ambasada japoneze