Shkup, 31 dhjetor 2025 (MIA) - Uroj që Viti i Ri të jetë një hap përpara drejt paqes së qëndrueshme botërore, bazuar në të drejtën ndërkombëtare dhe institucionet ndërkombëtare, dua që të vendosemi në Bashkimin Evropian, të vendosur të jetojmë në një mjedis të sundimit të ligjit, demokracisë, prosperitetit ekonomik dhe një mjedisi të shëndetshëm, porositi presidentja Gordana Siljanovska-Davkova në urimin e saj për Vitin e Ri 2026.

"Personalisht ju uroj secilit prej jush Vitin e Ri! Gëzuar Viti i Ri 2026, fëmijë të dashur, gëzuar Viti i Ri të nderuar të rinj, gëzuar Viti i Ri të nderuar qytetarë", tha ajo.

Në urimin e saj për Vitin e Ri, presidentja Siljanovska-Davkova u kthye te tiparet kryesore të vitit që lëmë mbrapa, duke e vlerësuar vitin 2025 si një vit të mbushur me ndryshime në skenën ndërkombëtare dhe procese të rëndësishme në vend.

Ajo theksoi se bota do ta kujtojë vitin për ndryshimet dramatike në rendin ndërkombëtar, luftërat e paimagjinueshme me viktima të shumta njerëzore, militarizimin e përshpejtuar, si dhe krizat klimatike në rritje, ekologjike dhe energjetike. Sipas saj, një sfidë shtesë përbënin institucionet ndërkombëtare të margjinalizuara dhe e drejta ndërkombëtare e suspenduar.

Në planin vendor, Siljanovska-Davkova vlerësoi vitin 2025 si vitin e fillimit të proceseve kyçe.

"Në vend, viti 2025 ishte viti i fillimit të reformave në gjyqësor, hapjes së një beteje me korrupsionin dhe krimin, krijimit të një strategjie kombëtare zhvillimi, vendosjes së partneriteteve të reja strategjike në funksion të reformave ekonomike dhe të tjera, një ofensive infrastrukturore, një zgjidhje afatgjate për çështjen e energjetikës, një zgjidhje sistematike për bashkëpunimin me diasporën", tha Siljanovska-Davkova.

Si momentin më të vështirë për të gjithë qytetarët, presidentja përmendi tragjedinë në Koçan, duke theksuar se kjo dhimbje do të mbetet e pranishme përgjithmonë. Ajo tha se është detyrim i shtetit dhe shoqërisë të mos harrojnë familjet e viktimave dhe të lënduarve, por edhe të sigurohet drejtësi.

“Sakrifica e tyre e pamasë duhet të na bëjë njerëz më të mirë, si dhe të krijojë një sistem politik dhe ligjor që nuk do të lejojë viktima të reja të pafajshme”, theksoi presidentja në mesazhin e saj.

Foto: printskrin