Shkup, 13 dhjetor 2023 (MIA) - Presidenti Stevo Pendarovski sot pranoi letrat kredenciale të Kristin Melsom, ambasadores së sapoemëruar të Mbretërisë së Norvegjisë në Republikën e Maqedonisë së Veriut me seli në Beograd. 

Presidenti Pendarovski, siç njoftoi kabineti i tij, në fjalimin e ceremonisë së dorëzimit të letrave kredenciale, shprehu kënaqësinë për marrëdhëniet e shkëlqyera dypalëshe dhe bashkëpunimin e suksesshëm mes dy vendeve mike, të cilat ushqehen duke mbajtur një dialog të vazhdueshëm politik.

Duke vënë në dukje se Mbretëria e Norvegjisë edhe pse nuk është anëtare e Bashkimit Evropian, ajo në mënyrë aktive kontribuon në proceset e transformimit evropian të shoqërisë së Maqedonisë, presidenti Pendarovski vlerësoi se të dy vendet, si anëtare të NATO-s, janë aleatë të ngushtë që ndajnë të njëjtat sfida sigurie, të bashkuar në mbrojtjen e rendit ndërkombëtar, bazuar në rregulla dhe vlera demokratike.

Ai vlerësoi se ekziston një potencial i madh i pashfrytëzuar dhe hapësira për thellimin e mëtejshëm të bashkëpunimit, sidomos në rrafshin ekonomik, dhe në këtë kontekst ai u dërgoi një mesazh komuniteteve të biznesit dhe Odave tregtare nga të dyja palët që të rrisin tregtinë, për të shfrytëzuar potencialet ekonomike dhe për të iniciuar investime në sektorin e IT dhe në energji.

Ambasadorja Melson në fjalimin e saj theksoi se marrëdhëniet dypalëshe mes dy vendeve bazohen në një themel solid të miqësisë historike dhe theksoi se ato do të vazhdojnë të zhvillohen më tej.

"Ajo e vlerësoi angazhimin tonë për reformat e mbrojtjes, si prioritet i përbashkët në agjendën dypalëshe, dhe theksoi bashkëpunimin në fushën ushtarako-mjekësore, vizitat e zyrtarëve tanë në Norvegji për trajnim dhe shkëmbim idesh, si dhe bashkëpunimi në kuadër të Akademive ushtarake të dy vendeve", thuhet në nkumtesë. qa/

Foto: kabineti i presidentit të RMV-së