Shkup, 18 shtator 2023 (MIA) - Presidenti i shtetit Stevo Pendarovski, në suaza të pjesëmarrjes në Asamblenë e Përgjithshme  të Kombeve të Bashkuara, sot mori pjesë në hapjen e Forumit Politik të nivelit të lartë për zhvillim të qëndrueshëm nën udhëheqësinë e Asamblesë së Përgjithshme dhe iu drejtuar dialogut të liderëve "Rritja e aktiviteteve të tranzicioneve kyçe për të përshpejtuar përparimin në Objektivat e Zhvillimit të Qëndrueshëm".

Në fjalën e tij, presidenti Pendarovski theksoi se me mbështetjen e agjencive të KB-së dhe mbështetjen e donatorëve, kemi bërë përparim në arritjen e Objektivave të Zhvillimit të Qëndrueshëm dhe shteti ka vendosur tri obligime kryesore kombëtare: investim në zhvillimin e aftësive për të ardhmen si parakusht për rritjen ekonomike, rritja e pjesës së burimeve të ripërtëritshme të energjisë për të mbështetur veprimet klimatike dhe qëndrueshmërinë e energjisë dhe miratimi i Strategjisë Kombëtare për Zhvillim, e cila së bashku me Kornizën Zhvillimore MKD2030 duhet të racionalizojë të gjitha Objektivat e Zhvillimit të Qëndrueshëm në shoqërinë e Maqedonisë.

"Rreziqet dhe krizat e akumuluara të sotme janë vetëm një pararojë e së ardhmes që e pret botën tonë nëse nuk i zbatojmë Objektivat për zhvillim të qëndrueshëm. Vetëm me veprime të guximshme, ambicioze dhe të drejta mund ta shmangim një skenar të tillë", tha Pendarovski.

Maqedonia e Veriut, theksoi ai, miratoi Kornizën e Bashkëpunimit për Zhvillim të Qëndrueshëm 2021-2025, dhe me mbështetjen e agjencive të KB-së dhe mbështetjen e donatorëve, arritëm përparim në arritjen e Objektivave të Zhvillimit të Qëndrueshëm dhe vendosëm tri obligime kryesore kombëtare.

Për të investuar në zhvillimin e aftësive për të ardhmen si parakusht për rritjen ekonomike, tha Pendarovski, ne kemi nevojë për arsim të përshtatur me nevojat e tregut të punës, zvogëlimin e hendekut gjinor në fushat STEM dhe krijimin e vendeve të punës për brezin e ri digjital.

"Së dyti, rritja e pjesës së burimeve të rinovueshme të energjisë për të mbështetur veprimet klimatike dhe qëndrueshmërinë e energjisë në përputhje me kontributet e forcuara të përcaktuara në nivel kombëtar, Strategjinë Kombëtare për Zhvillimin e Energjisë dhe Strategjinë Afatgjatë për Veprimin Klimatik. Së treti, miratimi i Strategjisë Kombëtare për Zhvillim, e cila së bashku me Kornizën Zhvillimore MKD2030 duhet të racionalizojë të gjitha Qëllimet e Zhvillimit të Qëndrueshëm në Shoqërinë e Maqedonisë duke ndërtuar një konsensus që kapërcen dallimet etnike, fetare, brezash dhe politike", theksoi kreu i shtetit.

Pendarovski theksoi se qeverisja e mirë, sundimi i ligjit dhe antikorrupsioni janë kyçe për këtë qëllim.

Sipas tij, me plotësimin e këtyre përpjekjeve do të arrijmë tre qëllime.

Së pari, ne do të kontribuojmë për një planet më të sigurt dhe më të qëndrueshëm. Së dyti, ne do të zbatojmë 70 për qind të kritereve për anëtarësim në Bashkimin Evropian. E ardhmja jonë evropiane, tha ai, bazohet në thelb në zhvillimin e qëndrueshëm. Dhe së treti, vlerësoi presidenti Pendarovski, do të merremi me sfidën tonë më urgjente – emigrimin masiv të të rinjve. Suksesi i angazhimit tonë ndaj Objektivave të Zhvillimit të Qëndrueshëm për të krijuar një shoqëri të drejtë, gjithëpërfshirëse dhe të qëndrueshme do të matet me gatishmërinë e të rinjve tanë për të imagjinuar të ardhmen e tyre në atdheun e tyre.

"Nuk duhet të lejojmë që të presim kushte më të favorshme për zbatimin e Objektivave të Zhvillimit të Qëndrueshëm. Dhe ne nuk do të presim! Duhet ta bëjmë - në emër të gjeneratave të tanishme dhe të ardhshme", është mesazhi i presidentit Stevo Pendarovski. sa/

Foto: Kabineti i presidentit Stevo Pendarovski