Shkup, 3 janar 2025 (MIA) - Prokuroria Themelore Publike Shkup njofton se ka kryer hetim në Rashçe në vendin ku mbrëmë një veturë me udhëtarë ka dalë nga rruga dhe ka rënë në ujërat e Vardarit.

"Prokurori publik kujdestar nga Prokuroria Themelore Publike në Shkup dje ka kryer ekspertizë në vendngjarje në afërsi të Rashçes, ku një automobil me udhëtarë ka dalë nga rruga dhe ka rënë në ujërat e Vardarit. Pavarësisht kushteve jashtëzakonisht të vështira në terren të paarritshëm, janë ndërmarrë të gjitha veprimet për sigurimin e gjurmëve dhe provave për të përcaktuar shkaqet e aksidentit", theksojnë nga PPRMV.

Nga Prokuroria Publike bëjnë të ditur se bashkë me veturën nga ujërat e Vardarit janë nxjerrë edhe tre gra të vdekura, për të cilat është lëshuar urdhër për autopsi. Ata theksojnë se janë në kërkim të një personi tjetër, ndërsa në veturë udhëtonte edhe një fëmijë, i cili është gjetur i lënduar jashtë automjetit dhe është dërguar në Qendrën Klinike.

"Sipas informacioneve fillestare, automjeti drejtohej nga njëri prej të vdekurve. Gjithashtu do të lëshohet urdhër për ekspertizën e makinës. Sipas udhëzimeve të prokurorit publik, po intervistohen dëshmitarët okularë të ngjarjes, si dhe të afërmit e familjes në veturë për të hetuar të gjitha rrethanat", theksojnë nga Prokuroria Themelore Publike Shkup. sa/

Foto: Arkivi i MIA-s