Tiranë, 4 dhjetor 2023 (MIA) - Policia shqiptare në periudhën janar-nëntor të këtij viti ka sekuestruar tre milionë euro të pa raportuara në pikat kufitare, siç e kërkon ligji, gjë që ngre dyshime për origjinën e këtyre parave, të cilat tentuan të hynin ilegalisht në Shqipëri jashtë sistemit bankar, raporton Top çenëll.

Sipas statistikave të policisë, pjesa më e madhe e pasurive të konfiskuara janë euro (dy milionë), ndërsa pjesa tjetër janë monedha të tjera, dollarë, stërlina britanike dhe franga zvicerane.

Kontrollet kanë vërtetuar se aeroporti ndërkombëtar i Tiranës dhe porti i Durrësit janë vendkalimet ku kalonin paratë më të padeklaruara.

"Policia ka identifikuar si autorë të këtij krimi 86 persona, tetë prej të cilëve janë arrestuar, ndërsa pjesa tjetër janë në kërkim. Krahasuar me të njëjtën periudhë të vitit të kaluar, numri i tyre pothuajse është dyfishuar. Pothuajse në të gjitha rastet në pranga përfundojnë vetëm drejtuesit e mjeteve ku fshihen paratë dhe hetimi nuk arrin dot te personat që i posedonin këto para. Në të gjitha rastet hetuesit dyshojnë se paratë vijnë nga veprimtari kriminale jashtë vendit dhe synohen të investohen në Shqipëri", raporton televizioni.

Rasti i fundit i tillë është regjistruar dy ditë më parë në pikën kufitare të Morinës, në kufirin Shqipëri-Kosovë, ku janë sekuestruar 50 mijë euro.

Sasia më e madhe e sekuestrimit u gjet tre vite më parë, kur në portin e Durrësit u zbuluan 1.5 milionë euro në një makinë “Tojota”. mb/