Bruksel, 21 korrik 2024 (MIA) - Zgjedhja e Donald Trampit për senatorin republikan 39-vjeçar nga Ohajo, Xhej. Di. (Xhejms Dejvid) Vens si kandidati i tij për zëvendëspresident të SHBA-së dhe mundësia që ky çift të "fitojë" Shtëpinë e Bardhë në Uashington në zgjedhjet presidenciale të nëntorit, shkakton shqetësim të mëtejshëm në BE për të ardhmen e angazhimit të SHBA-së për sigurinë evropiane.

Bindjet politike të Vensit, të cilat shihen si një përzierje e izolacionizmit dhe populizmit ekonomik, gjejnë mbështetje midis aleatëve dhe mbështetësve më konservatorë të Trampit, por jo një numri të madh republikanësh me ndikim më të moderuar.

Vens konsiderohet si një nga mbështetësit më të përkushtuar të agjendës së Trampit "Ta bëjmë Amerikën sërish të madhe", veçanërisht për tregtinë, politikën e jashtme dhe imigracionin. Ai është pjesë e krahut radikal të Partisë Republikane që promovon bindjet izolacioniste të politikës së jashtme nën moton "Amerika e para".

Mundësia e kthimit të Trampit në Shtëpinë e Bardhë tashmë po shkaktonte shqetësim në BE, i cili tani është rritur më tej nga përzgjedhja e Vensit si kandidat për zëvendëspresident. Ky shqetësim bazohet kryesisht në kundërshtimin e shprehur publikisht të Vensit ndaj ndihmës së SHBA-së për Ukrainën.

Vens ishte një nga kundërshtarët më të mëdhenj të projektligjit të miratuar nga Kongresi amerikan për paketën e ndihmës ushtarake për Ukrainën në shumën prej 60 miliardë dollarësh. Përveç kësaj, duke iu drejtuar Forumit të Sigurisë në Mynih, Vens kundërshtoi një rritje të fondeve të akorduara nga Uashingtoni për të mbështetur Ukrainën dhe kritikoi, sipas tij, "varësinë e tepruar të Evropës nga Shtetet e Bashkuara të Amerikës në sferën e sigurisë".

Ai tha se presidenti rus Vladimir Putin nuk përbën një "kërcënim ekzistencial" për Evropën, se amerikanët dhe evropianët nuk mund të ofrojnë municion të mjaftueshëm për Ukrainën për të mposhtur Rusinë dhe se lufta duhet të përfundojë me "një lloj marrëveshje paqeje".

Përveç kësaj, Vens shmangu takimin me presidentin ukrainas Volodimir Zelenski gjatë qëndrimit të tij në Mynih.

"Ka shumë djem të këqij nëpër botë. Dhe unë për momentin jam shumë më i interesuar për disa nga problemet në Azinë Lindore tani sesa për Evropën", tha Vens në një fjalim në Mynih, duke shtuar se "batanija amerikane e sigurisë" ka rezultuar me "atrofinë e sigurisë evropiane".

Pikëpamjet e tilla kanë ngritur shqetësime midis liderëve dhe diplomatëve evropianë në Mynih, pasi ato largohen nga dypartiaku i zakonshëm në SHBA kur bëhet fjalë për marrëdhëniet transatlantike dhe bashkëpunimin e sigurisë dhe mbrojtjes me Evropën.

Për më tepër, diplomatët evropianë presin që Vens t'i "shtyjë" evropianët në një mosmarrëveshje edhe më të madhe me Pekinin sesa ai që ekziston tani me një hetim të BE-së mbi ndikimin e subvencioneve kineze në një sërë produktesh, nga automjetet elektrike te mishi i derrit dhe alkooli. sa/

Foto: Iks/ Senati i SHBA-së/ Arkivi i MIA-s