Lubjanë, 7 janar 2024 (MIA)  -  Pesë persona janë bllokuar në shpellën Krizhna Jama në jugperëndim të Sllovenisë dhe nuk mund të dalin për shkak të nivelit të lartë të ujit të shkaktuar nga reshjet e dendura, njoftuan sot autoritetet lokale.

 Mes tyre është edhe një familje treanëtarëshe dhe dy guidë që ndodhen aty që nga e shtuna, kur niveli i ujit në shpellë u rrit, duke e bllokuar daljen.

 Ekipet sllovene të shpëtimit bënë të ditur se zhytësit kanë arritur deri te grupi dhe e transferuan në një vend të sigurt të parashikuar për situata të tilla, ku do të duhet të presin uljen e nivelit të ujit.

Në aksionin e shpëtimit për momentin janë përfshirë 35 shpëtimtarë dhe tetë zhytës nga e gjithë Sllovenia, të ndihmuar nga 11 zjarrfikës dhe pjesëtarë të forcave për mbrojtje civile, bënë të ditur autoritetet.

 Foto: STA