Shkup, 30 gusht 2023 (MIA) - Nuk ka asnjë ndikim politik në përzgjedhjen e kompanisë Eurovia për përshtatjen e sallës Boris Trajkovski për nevojat e takimit të Ministrave të OSBE-së sepse ka ofruar çmimin më të ulët, i cili është kriteri i vetëm që ajo të pranohet nga Ministria e Punëve të Jashtme. Çdo zgjedhje tjetër do të ishte shkelje e ligjit dhe dëmtim i buxhetit, tha sot shefi i diplomacisë, Bujar Osmani.

"Ministria e Punëve të Jashtme nuk ka zgjedhur një kompani, por kur ke një procedurë të hapur në të cilën çdo kompani mund të konkurrojë dhe kriteri yt i vetëm është çmimi 100 për qind, ajo që bën Ministria e Jashtme është vetëm renditja e tyre. Kur është 100 për qind çmimi, thjesht nuk vendosni, as nuk mund të ndikoni. Dhe prandaj tema e ndikimit politik është absolutisht e pabazuar sepse ne nuk vendosim asgjë, nuk vendos as komisioni, as unë. Çmimet thjesht renditen - ai që vjen i pari. Në këtë rast, po të ishte edhe një denar, nuk kishim mundësi për zgjedhje tjetër", tha Osmani, duke iu përgjigjur pyetjes së një gazetari pas konferencës së përbashkët për media me ministren e Punëve të Jashtme kanadeze, Melani Zholi, e cila është në një vizitë pune në vend.

Ai ka treguar se sot me kërkesë të tij i gjithë dokumentacioni lidhur me ofertën e Eurovia-s do t'i dorëzohet të gjitha institucioneve kompetente, por edhe KSHPK-së, ndonëse thotë se ende nuk ka kërkesë për këtë nga ana e tyre. Ai i cilësoi spekulime komentet e opozitës për këtë tender.

"Prandaj nuk e kuptoj reagimin në lidhje me Ministrinë e Punëve të Jashtme. Ju mund të pyesni kompanitë pse kanë ofruar çmime të tilla, por MPJ ​​nuk ka absolutisht se si të përgjigjet. Kjo është ngjarja më e rëndësishme në historinë e vendit, përfshirë edhe karrierën time politike, dhe nuk do të njolloja kurrë një proces të tillë. Prandaj u thashë njerëzve në Ministrinë e Jashtme të dërgojnë menjëherë të gjithë dokumentacionin në KSHPK, në Prokurori, në Entin Shtetëror për Revizion sepse kjo gjueti shtrigash është në rregull, por nuk mund t'i shkaktojë kaq shumë dëm shtetit në momenti më kritik, bazuar në deklarata spekulative", ka sqaruar Osmani.

Ai shtoi se nuk ka asnjë bazë për veting-un e kompanive, gjegjësisht nuk ekziston një kriter i tillë në Ligjin për Prokurimin Publik në të cilin kompanitë që dhuronin te  partitë politike nuk lejohen të marrin pjesë në tenderë.

"Nëse opozita pranon, nëse partitë e tjera politike pranojnë - kompanitë që u dhurojnë partive, duhet të dëshmojnë se dhurojnë, sepse ne nuk kemi një informacion të tillë. E di që nuk e besoni, por nga mediat mora vesh që kompania është donatore. Nuk u gëzova kur më sollën raportin e renditjes, sepse i prisja këto reagime dhe nuk do t'i hidhja kurrë njollë ngjarjes më të rëndësishme në historinë e këtij vendi. Nuk ka konflikt interesi. Unë kam firmosur një deklaratë nën çdo përgjegjësi, qoftë penale, qoftë materiale e morale, se nuk kam asnjë konflikt interesi. E vetmja gjë që përmendet është se një i afërm i pronarit ka qenë ministër. Pra, së pari – po, e kam njohur të ndjerin Abdulaqim Ademi i cili ka gjashtë vjet që ka vdekur, nuk ka qenë ministër që nga viti 2015, por të keqpërdoret emri i tij në këtë kontekst është e gabuar. Ju siguroj se procesi ka qenë më transparenti", tha Osmani.

Ai konfirmoi se ka pasur një ankesë në proces nga kompania e rendit të tretë, por se Komisioni Shtetëror ka marrë vendim që MPJ ka bërë një zgjedhje të mirë dhe se çdo zgjedhje tjetër do të ishte e kundërligjshme.

"E di që tema është tërheqëse, është e lehtë t'i lidhësh gjërat në një komplot të madh. Por ju mund të më akuzoni për gjithçka, për korrupsion  nuk  mundet, as kur kam qenë person privat, as mjek, as kirurg, as si ministër. Nuk e kam atë cilësi, sidomos jo për një ngjarje kaq të rëndësishme për mua dhe për Ministrinë dhe për vendin", është vendimtar Osmani.

Sa i përket Samitit të OSBE-së, siç theksoi ai, OSBE-ja ka një rregullore të tërë se si duhet të organizohet konferenca në pjesën e zgjedhjes së një kompanie projektuese dhe për specifikimet e tenderit sipas standardeve të përcaktuara. Zgjedhja e sallës "Boris Trajkovski" është bërë nga delegacioni i OSBE-së nga Vjena, i cili ka konstatuar se qendra sportive me përshtatje të mirë mund të rimodelohet, por nuk ka pasur kohë dhe as para të mjaftueshme për të ndërtuar një të re, e cila do të kushtonte mbi 10 milionë euro.

"Ministria e Punëve të Jashtme nuk ka vendosur për asnjë çështje. Së pari, standardet i ka përcaktuar OSBE-ja, një komision nga Vjena, dizajni është bërë nga një kompani. Kompania është përzgjedhur sipas çmimit më të ulët, procedurës më transparente të mundshme për të pasur konferencën më të mirë të mundshme të OSBE-së në dhjetor. Nuk ka absolutisht asgjë dhe nuk do të lejoja që në konferencën më të madhe në historinë e shtetit, në karrierën time politike, t'i vihej një njollë të bërit një nder dikujt që i ka dhuruar dikujt - kjo është jashtë mendjes sime dhe jashtë mënyrës se si funksionoj", përsëriti Osmani.

Komisioni Shtetëror për Parandalimin e Korrupsionit ka hapur procedurë për këtë rast, për të cilin ka reaguar edhe opozita. Përshtatja e qendrës sportive Boris Trajkovski për samitin e OSBE-së në dhjetor kushton rreth 1.8 milionë euro.

Lidhur me përzgjedhjen e kompanisë “Rejting”, Osmani sot në konferencën për media tha se ajo është përzgjedhur në muajin janar sepse kryesimi i OSBE-së është mbi të gjitha një mundësi për promovimin e shtetit, si dhe për mbështetje në dizajnimin logon dhe mesazhet. Ajo kontratë nuk është shkëputur, funksionon deri në fund të vitit. sa/