Shkup, 8 shtator 2024 (MIA) - Filantropia, bartës kryesor i së cilës është sektori i biznesit, jo vetëm që kontribuon në rritjen ekonomike, por paraqet edhe mundësi për përmirësimin e shoqërisë në tërësi duke promovuar një kulturë të fortë të përgjegjësisë shoqërore, u tha në forumin e sotëm të biznesit që u organizua nga Oda Ekonomike e Maqedonisë Veriperëndimore (OEMVP).

Siç theksoi kryetari i Odës, Mendi Qyra, vendit i nevojiten liderë që janë të gatshëm të investojnë në projekte për të ndihmuar njerëzit që kanë nevojë. Ai gjithashtu theksoi se komuniteti i biznesit shpeshherë i mbulon lëshimet e institucioneve përmes nismave të pavarura, duke zgjidhur problemet për të cilat tashmë i ka paguar taksat.

"Ne jemi krenarë për kompanitë tonë që mbështesin projekte të rëndësishme dhe sjellin ndryshime pozitive në komunitetin. Në i inkurajomë të gjithë anëtarët të përfshihen në projekte që u ndihmojnë atyre që kanë nevojë", tha Qira në forumin në të cilin u prezantua Libri i 2-të i bardhë për praktrika të mira filantropike dhe përgjegjëse-shoqërore. 

Sipas tij, praktikat e mira dhe përgjegjësia shoqërore e anëtarëve të OEMVP janë një forcë e rëndësishme për ndryshime pozitive në komunitet.

"Filantropia është një mundësi për të ndihmuar dhe krijuar vlera të qëndrueshme. Përgjegjësia shoqërore nuk është vetëm një detyrim, por edhe një mundësi për ndryshime reale në jetën e njerëzve. Së bashku do të vazhdojmë të ndërtojmë një shoqëri më të fortë dhe më të bashkuar", nënvizoi Qyra.

Nikica Kusenikova nga projekti i USAID-it “Partneritete për donacion” vlerësoi se vendi ka një masë kritike të liderëve të biznesit të cilët janë të përkushtuar në ndërtimin e një shoqërie të bazuar në solidaritet dhe zhvillim të qëndrueshëm.

"Kompanitë janë shtytëse të zhvillimit ekonomik, por roli i tyre në zhvillimin më të gjerë shoqëror është gjithashtu i rëndësishëm sepse ato kanë burime të konsiderueshme, jo vetëm financiare. Ata punësojnë një numër të madh të qytetarëve tanë dhe kjo mund të vihet në funksion të zhvillimit të qëndrueshëm. Kur kompanitë veprojnë individualisht dhe së bashku, ato mund të jenë vërtet shtytës për një të ardhme më të mirë për komunitetin tonë. Nëse ka një shkatërrim të burimeve dhe dalje të personelit, dhe nuk ka fuqi të mjaftueshme punëtore, një popullsi të shëndetshme dhe infrastrukturë të nevojshme, as biznesi nuk mund të zhvillohet, tha Kusenikova.

Ajo iu referua edhe Klubit të bizneseve të përgjegjshme, i cili shërben si një platformë kombëtare për kompanitë për të promovuar përgjegjësinë shoqërore dhe për të përmbushur detyrimet në drejtim të ndikimit në shoqëri dhe mjedisin jetësor.

Në Librin e Bardhë të këtij viti janë “Biraria” – Shkup, “ZSF KOM”, “Maliqi Group”, “Silkapor”, “Unika”, “Trim dhe Lum”, “Dauti Komerc”, “Umbrella” dhe “Euro Aktiva”.

Në forumin e biznesit, përveç anëtarëve të OEMVP-së dhe partnerëve të tyre afarist, ishin edhe përfaqësues nga Universiteti i Tetovës dhe Universiteti Nënë Tereza. ls/

Foto/video: MIA