Shkup, 20 prill 2024 (MIA) - Ekonomia ishte dhe mbetet prioritet kryesor i Qeverisë. Pritjet që u ndanë në takimet me FMN-në dhe Bankën Botërore janë se kriza e dekadës kryesisht ka mbaruar dhe ne mund të fokusohemi në rritjen ekonomike dhe të arrijmë shkallët e dëshiruara të rritjes, deklaroi zëvendësministri i Financave, Filip Nikolloski, në një intervistë për Zërin e Amerikës gjatë pjesëmarrjes në takimet pranverore të Fondit Monetar Ndërkombëtar (FMN) dhe Bankës Botërore (BB) në Uashington.

"Nuk duhet të harrojmë se në këto katër vite kemi arritur një krizë. Kemi pasur krizë postkovid, krizë energjitike dhe krizë inflacioniste. Mirëpo, arritëm që ta mbajmë standardin e qytetarëve, pagat u rritën, pensionet u rritën, kemi rritje rekord të pagës mesatare për këto shtatë vite", theksoi Nikolloski.

Siç tha ai, fokusi kryesor është ruajtja e standardit të qytetarëve. Ai përmendi se në vitin 2023, Gjermania kishte një rritje negative prej -0,3 për qind.

"Duke pasur parasysh se Gjermania është partneri ynë më i madh tregtar, nuk mund të presim që ne si ekonomi e vogël dhe e hapur të kemi rritje superiore. Kur menaxhoni kriza, nuk mund të përqendroheni te rritja. Tashmë në takimet me FMN-në dhe Bankën Botërore thuhet se në pjesën më të madhe kriza është prapa dhe është tejkaluar. Kjo do të ndikojë që ekonomia maqedonase të arrijë rritjen e dëshiruar në katër vitet e ardhshme dhe të lëvizë në nivele ndërmjet 4 dhe 5 për qind. Do të përshpejtojë ekonominë dhe do të përmirësojë standardin e qytetarëve", tha zëvendësministri i Financave.

Ai përkujtoi se nëntë pakot e masave kundër krizës i drejtoheshin drejtpërdrejt qytetarëve dhe sektorit të biznesit. Njëkohësisht, ai tha se po zbatohen masa dhe politika për ruajtjen e standardit të qytetarëve.

"Nga viti 2017, një pagë mesatare në vend së bashku me pagën minimale, çdo herë në këto shtatë vite kanë qenë mbi nivelin e shportës së konsumatorit. Edhe tani paga mesatare ka arritur në 40.000, paga minimale është 23.000 denarë, kurse shporta konsumatore është 60.000 denarë. Pikërisht me politikat dhe masat e ndërmarra nga kjo qeveri ruhet standardi i qytetarëve", theksoi Nikolloski. mb/