Uashington, 12 korrik 2022 (MIA) – Agjencia Kombëtare e Aeronautikës dhe Hapësirës (NASA) sot prezantoi një seri imazhesh që zbulojnë potencialin e "Xhejmz ueb", observatorit më të madh dhe më të fuqishëm hapësinor të lëshuar ndonjëherë. Besohet se teknologjitë e avancuara që mundësojnë këtë teleskop do të ndryshojnë mënyrën se si njerëzit e shohin hapësirën. Në një ngjarje që filloi këtë mëngjes në Qendrën Hapësinore "Godard" në Marilend, ndërsa u transmetua drejtpërdrejt në kanalin në Jutjub të NASA-s, personat zyrtarë dhe përfaqësues të agjencisë ndanë skena të kapura gjatë javëve të para të funksionimit të "Ueb" i cili u nis në dhjetor. Observatori, në vend që të rrotullohet rreth Tokës si teleskopi hapësinor i mëparshëm "Habëll", rrotullohet rreth Diellit në një distancë prej 1.5 milionë kilometrash nga planeti ynë. Katër imazhet e paraqitura sot treguan Mjegullnajën Karina, më pas një pamje të katër galaktikave të quajtura Kuintet e Stefanit, lexime atmosferike nga planeti VASP-96b që rrotullohet rreth një ylli të largët dhe një skenë nga Mjegullnaja planetare e Unazës Jugore. Në Shtëpinë e Bardhë mbrëmë, Presidenti Xho Bajden, zbuloi "fushën e thellë" të hapësirës, ​​një përfaqësim i galaktikave të krijuara në një kohë shumë më afër fillimit të universit. Teleskopi hapësinor dhe misioni janë punë e NASA-s, ku morën pjesë edhe Agjencia Kanadeze e Hapësirës (CSA) dhe Agjencia Evropiane e Hapësirës (ESA). ls/