Dibër, 17 qershor 2024 (MIA) - Në tri shkollat ​​fillore komunale të komunës së Dibrës, prej vitit në vit, numri i nxënësve që ulen për herë të parë në bankat shkollore është në rënie.

Sipas Burim Kaziut, inspektor komunal i arsimit në afatin e caktuar nga Ministria e Arsimit dhe Shkencës janë regjistruar 88 nxënës të klasës së parë në tri shkollat ​​fillore SHFK "Penestia" dhe “Said Najdeni" në qytet, si dhe në SHFK "Riste Ristevski" në Kosovrast të poshtëm ku janë regjistruar gjithsej 88 filloristë.

"Patjetër të theksoj se në periudhën para fillimit të vitit të ri shkollor 2024/2025 pritet rritje e numrit të nxënësve të klasës së parë. Është rregull e pashkruar që prindërit i regjistrojnë fëmijët pak ditë para ose në fillim të vitit shkollor. Por, numri do të jetë më i ulët në krahasim me vitin e kaluar shkollor", thotë Kaziu.

Ai shton se sipas statistikave të institucioneve kompetente, këtë vit pritet që të regjistrohen pak më shumë se 130 nxënës të klasës së parë, krahasuar me 180 nxënës të vitit të parë.

Arsyeja kryesore është migrimi masiv i popullsisë në vendet e Evropës Perëndimore dhe SHBA-së, por edhe migrimi i popullsisë brenda vendit, kryesisht në Shkup.

Shifrat e viteve të fundit as që mund të krahasohen me ato të mëparshmet. Para dy dekadash numri i nxënësve të klasës së parë ishte mbi 400 ndërsa në vitet e 80-ta të shekullit të kaluar, para migrimit, numri i tyre ishte mbi 600 nxënës të klasës së parë.

Në kuadër të "Penestias" e cila është shkolla fillore më e madhe në rajonin e gjerë, funksionon edhe një shkollë rajonale në fshatin Xhepishte, ndërsa në "Riste Ristevski" shkolla rajonale në Mogorçë dhe Kosovrast i Epërm. rq/

Foto: MIA