Tetovë, 3 korrik 2023 (MIA) - Në Tetovë nga nesër deri të shtunën do të mbahet edicioni i 12-të i Festivalit Ndërkombëtar të Filmit në Tetovë - TIFF ODA. Filmat e festivalit sivjet do të shfaqen në ambientet e Universitetit të Tetovës, jashtë, si dhe në sallën e skenës së Fakultetit të Arteve Dramatike në Qendrën për Kulturë në qendër të qytetit.

"Kemi pasur 2941 aplikime nga 112 vende të botës. Do të shfaqim këtë vit 45 filma në kategoritë Panorama Blu Ballkanike, Fiksion i shkurtër, Dokumentarë të shkurtër, Animacion të shkurtër dhe Film studentor. Në kategorinë Vin Panorama këtë vit kemi katër nënkategori për filmat me metrazh të shkurtër. Do të kemi një kategori Blue Balkan Panorama me pjesëmarrjen e filmave të realizuar në dy vitet e fundit në rajonin e Ballkanit. Kemi premiera evropiane me filma interesantë të pranishëm në ngjarje të mëdha filmike", tha Agim Abdulla, pjesë e organizimit të festivalit dhe anëtar i jurisë për filma të shkurtër.

Vendimin për çmimet për filmat pjesëmarrës në këtë edicion në garën ballkanike do ta marrë juria e përbërë nga Kaltrina Krasniqi (regjisore), Lazar Sekulovski (montazher) dhe Refet Abazi (aktor). Juria në kategoritë e filmave me metrazh të shkurtër këtë vit përbëhet nga Ilire Vinca (aktore), Flonja Kodeli (regjisore) dhe Çigdem Sezgin (regjisore).

Pas hapjes solemne nesër në orën 20:30 në ambientet e jashtme në amfiteatrin e Rektoratit të Universitetit të Tetovës, do të shfaqet filmi i parë "Virgjëresha Shqiptare" me regji të Bujar Alimanit dhe një bashkëproduksion i Shqipërisë, Gjermanisë, Belgjikës dhe Kosovës.

Në sallën e Fakultetit të Arteve Dramatike, përveç shfaqjes së filmave me metrazh të shkurtër, çdo ditë do të ketë edhe tryeza të rrumbullakëta me autorët e filmave.

Hyrja në të gjitha shfaqjet është falas. sa/

foto: MIA