Shkup, 12 nëntor 2024 (MIA) - Deklaratat e mëparshme të lidershipit evropian theksojë zgjerimin e BE-së si një imperativ gjeopolitik, parim që rajoni ynë e tregon përmes përkushtimit dhe përparimit të tij, theksoi ministri për Çështje Evropiane Orhan Murtezani në konferencën e sotme në Universitetin Ndërkombëtar të Ballkanit, të quajtur "Perspektiva për një të ardhme të përbashkët: procesi i inkuadrimit të Maqedonisë së Veriut dhe marrëdhëniet BE-Turqi".

Theksi i Bashkimit Evropian për përshpejtimin e proceseve të anëtarësimit dhe zgjidhjen e çështjeve dypalëshe përmes diplomacisë së synuar strategjikisht, thotë Murtezani, tregon një kuptim më të thellë nga BE-ja për rëndësinë e zgjerimit të Unionit. Rruga e vendit drejt BE-së, shtoi ai, është e lidhur ngushtë me stabilitetin dhe prosperitetin e të gjithë Ballkanit Perëndimor.

"Maqedonia e Veriut nuk është vetëm një anëtare e ardhshme, por edhe një partner aktual në kauzën evropiane. Rruga përpara e Maqedonisë së Veriut është e lidhur ngushtë me stabilitetin dhe prosperitetin e të gjithë Ballkanit Perëndimor. Angazhimi ynë ndaj Tregut të Përbashkët Rajonal dhe Procesit të Berlinit konfirmon gatishmërinë tonë për të kontribuar në kohezionin rajonal dhe integrimin ekonomik, duke e pozicionuar Ballkanin Perëndimor si një komponent jetik të së ardhmes së Evropës. Aspiratat tona për anëtarësim nuk duhet të shihen më si një shpresë e largët, por si një rezultat logjik dhe në kohë i një vizioni të përbashkët", tha Murtezani.

Ai vlerësoi se integrimi në BE do të jetë një pikë kthese kyçe në historinë evropiane dhe se vendi është plotësisht i përkushtuar në përpjekjet e përbashkëta për arritjen e stabilitetit dhe kohezionit në rajon.

"Tani kemi hyrë në një fazë kyçe të përmbushjes së standardeve për hapjen e Klasterit 1 për sundimin e ligjit dhe vlerat themelore. Përveç kësaj, ne propozuam udhërrëfyes lidhur me reformat në drejtësi, të drejtat e pakicave dhe reformën e administratës publike. Secili prej tyre është një moment historik dhe një angazhim - një demonstrim i kapacitetit tonë për të zbatuar ndryshime reale dhe të qëndrueshme. Raporti vjetor i progresit, i publikuar nga Komisioni Evropian dy javë më parë, konfirmon se Maqedonia e Veriut është e gatshme të avancojë me besim drejt anëtarësimit", tha Murtezani.

Progresi është domethënës, thotë ministri, por "jemi plotësisht të vetëdijshëm se integrimi në BE duhet të jetë më shumë se përmbushja e një sërë kriteresh teknike". Perspektivat për anëtarësim në Union, shtoi ai, reflektojnë jo vetëm harmonizimin e politikave, por edhe konvergjencën e fateve.

"Perspektivat për anëtarësimin tonë reflektojnë jo vetëm harmonizimin e politikave, por edhe konvergjencën e fateve. Në botën tonë të ndërlidhur, suksesi i një kombi në arritjen e vlerave demokratike, stabilitetit dhe prosperitetit forcon forcën kolektive të të gjithëve. Sot, Maqedonia e Veriut qëndron si një partner plotësisht i përkushtuar në përpjekjen e përbashkët për arritjen e stabilitetit dhe kohezionit në rajonin tonë", nënvizoi Murtezani. sa/

Foto: Ministria për Çështje Evropiane