Shkup, 26 korrik 2023 (MIA) - Punëdhënësit nga sektori publik dhe privat janë të detyruar të lirojnë nga puna gratë shtatzëna dhe personat mbi 60 vjeç, thekson Ministria e Punës dhe Politikës Sociale në bashkëpunim me Inspektoratin Shtetëror të Punës, për të sqaruar dhe zbatuar vetëm rekomandimet e Qeverisë të Republikës së Maqedonisë së Veriut lidhur me punën gjatë valës së të nxehtit.

"Rekomandimet për sektorin privat i referohen vetëm mënyrës së organizimit të orarit të punës me qëllim mbrojtjen e punëtorëve nga ekspozimi direkt në diell dhe shmangien e qëndrimit në natyrë nga ora 11:00 deri në orën 17:00. Subjektet juridike që kryejnë veprimtari ndërtimore dhe aktivitetet e të cilëve kryhen në natyrë janë të detyruar të ndërpresin veprimtarinë e tyre në periudhën prej orës 11 deri në 17. Duke pasur parasysh se disa veprimtari të personave juridikë mund të paraqesin rrezik për shëndetin e punëtorëve të ekspozuar, Inspektorati Shtetëror i Punës, përveç rekomandimeve, gjatë inspektimeve vepron edhe në përputhje me dispozitat e Ligjit për Siguri dhe Shëndet gjatë Punës", njofton MPPS.

Nga aty theksojnë se në pajtim me nenin 49 paragrafi 2 i Ligjit për siguri dhe shëndet në punë, nëse inspektori i punës në bazë të mbikëqyrjes te punëdhënësi konstaton se ekziston rrezik i menjëhershëm për sigurinë dhe shëndetin gjatë punës së të punësuarve me vendim do të ndalojë punën në tërësi.

"Duke pasur parasysh se në kushtet e valës së të nxehtit temperaturat e larta, pra indeksi i lartë UV, janë maksimalisht të shprehura, ato në vetvete paraqesin rrezik të menjëhershëm për sigurinë dhe shëndetin e punëtorëve, për çka inspektorët e punës kanë bazë ligjore për shqiptimin e masës së sipërpërmendur të inspektimit", theksojnë nga MPPS. sa/