MMJPH-ja: Ligjet për Liqenin e Ohrit, Kanionin e Matkës dhe Kënetën e Studençishtës kaluan vetëm në lexim të parë në Kuvend
- Post By Sara Ademi
- 12:02, 15 gusht, 2024
![MMJPH-ja: Ligjet për Liqenin e Ohrit, Kanionin e Matkës dhe Kënetën e Studençishtës kaluan vetëm në lexim të parë në Kuvend](https://new.mia.mk/images/20240815120202_big_730x400_73.webp )
Shkup, 15 gusht 2024 (MIA) - Në lidhje me informacionin që u shfaq dje në media se Kuvendi i Republikës së Maqedonisë së Veriut në seancën e mbajtur më 13.08.2024 i miratoi ligjet e veçanta me të cilat tre lokalitetet natyrore në vend: Liqeni i Ohrit, Kanioni i Matkës dhe Këneta e Studençishtës marrin status të veçantë të mbrojtur, Ministria e Mjedisit Jetësor dhe Planifikimit Hapësinor njofton se Projektligji për shpalljen e Liqenit të Ohrit Monument i Natyrës, Projektligji për shpalljen e kanionit të Matkës për monument të natyrës dhe Projektligji për shpalljen e Kënetës së Studençishtës për Park natyror janë në procedurë të rregullt miratimi dhe se u kanë kaluar dy trupave kryesorë punues të Kuvendit.
Bëhet fjalë, siç sqaron MMJPH, Komisionit për Transport, Transformim Digjital, Mjedis dhe Planifikim Hapësinor dhe Komisionit Ligjvënës dhe Ligjor të Kuvendit të RMV-së, që konstatuan se propozimet janë të pranueshme.
"Propozimet kaluan në lexim të parë në seancën plenare të Kuvendit dhe janë në procedim të mëtutjeshëm në trupat punuese të Kuvendit", thuhet në kumtesë. sa/
Foto: Arkivi i MIA-s dhe MMJPH