Shkup, 12 mars 2025 (MIA) – Nuk do të ketë ushtarë të Maqedonisë së Veriut në tokën ukrainase, këtë deri më tani nuk e ka kërkuar askush nga ne si shtet, deklaroi sot ministri i Mbrojtjes, Vllado Misajllovski pas vizitës të pjesëtarëve të Batalionit të Parë të Këmbësorisë së Armatës në kazermën “Çede Filipovski – Dame” në Kërçovë.

 “Si vend anëtar i NATO-s jemi vendi i katërt me radhë në ndarjen e ndihmës për pajisje të tjera për Ukrainën. Atë që e bëri kjo Qeveri gjatë periudhës së kaluar është ajo që ndau edhe një pako, por tani në këtë periudhë u ndryshua tregimi në gjeopolitikën në botë dhe ajo që mund të dëgjohej është se në tavolinë është propozim për paqe dhe ne jemi shtet i cili është i udhëhequr drejt paqes”, tha Misajllovski në përgjigjen e pyetjeve të gazetarëve. 

Misajllovski tha se në zgjidhjen paqësore duhet të shihet mundësia më e madhe, sepse kjo e përfshin edhe sigurinë kolektive. 

 “Së pari ka nevojë për paqe, ndërsa pastaj do të ketë nevojë për ndihmë shtesë ndaj Ukrainës veçanërisht për rimëkëmbjen e vendit në infrastrukturë, në kapacitete, por së pari duhet të arrihet zgjidhje paqësore me çka ne një qind për qind qëndrojmë pas zgjidhjes paqësore”, tha ministri. 

Konfirmoi se shefi i Shtatmadhorisë gjeneral – major Sashko Lafçiski dje ka marrë pjesë në takimin në Paris, në kuadër të forumit të mbrojtjes dhe sigurisë në Paris në organizim të shefave të Shtatmadhorive të Francës dhe Mbretërisë së Bashkuar. Në takim morën pjesë përfaqësues ushtarakë të 30 vendeve të BE-së dhe/ose NATO, në mesin e të cilëve Britania e Madhe dhe Turqia, nikoqir i të cilit ishte presidenti francez Emanuel Makron. 

 “Shefi ishte dje në atë takim, ne patëm disa biseda, megjithatë, ka mendime të ndryshme të vendeve të ndryshme, po shqyrtohen disa hapa të rinj, plane se si të vendoset paqja dhe si të veprohet në të ardhmen, por këto janë vetëm dislokime madhore të vendeve të ndryshme, por nuk është dhënë strikt si zgjidhje se çfarë do të ndodhë në periudhën e ardhshme. Është mirë që secili ka mendimin e vet, ne e shprehim qëndrimin tonë se jemi për zgjidhje paqësore, për paqe”, tha Misajlovski.

Pas bisedimeve njëditore midis Uashingtonit dhe Kievit në Xhide, Ukraina pranoi propozimin e SHBA-së për armëpushim 30-ditor. Përfaqësuesja e lartë e BE-së për Politikën e Përbashkët të Jashtme dhe të Sigurisë, Kaia Kallas përshëndeti deklaratën e përbashkët të Ukrainës dhe SHBA-së pas takimit të tyre në Arabinë Saudite, duke përfshirë propozimet për një marrëveshje armëpushimi, përpjekjet humanitare dhe vazhdimin e shkëmbimit të informacioneve të inteligjencës dhe ndihmën e SHBA-së për sigurinë. Ajo theksoi se BE-ja është e gatshme të luajë rolin e saj të plotë në mbështetjen e hapave të ardhshëm, së bashku me Ukrainën, SHBA-në dhe partnerët e tjerë.

Zëdhënësi i Kremlinit, Dmitrij Peskov nuk e përjashtoi mundësinë për bisedë telefonike mes presidentit rus Vladimir Putin dhe presidentit amerikan Donald Tramp pas bisedimeve amerikane-ukrainase në Xhide. 

Vendet e BE-së tashmë dhanë dritë të gjelbër për planin i cili ka për qëllim të mobilizojë deri 800 miliardë euro gjatë katër viteve për fuqizimin e mbrojtjes së kontinentit dhe për ndihmë të Ukrainës. fc/

Fotografia: Arkivi i MIA-s