Shkup, 15 shkurt 2024 (MIA) - Ministri i Drejtësisë Krenar Lloga realizoi takim me kryetarin e EURODREJTËSI-së, Ladislav Hamran në Hagë, Holandë.

Në takim, siç bëri të ditur Ministria e Drejtësisë, u diskutua për rëndësinë e pjesëmarrjes dhe angazhimit aktiv të vendeve kandidate përmes prokurorit për lidhje si demonstrim i përkushtimit dhe progresit në procesin e integrimit evropian, por edhe si mundësi që të jenë pjesë e proceseve që kryesisht janë rezervuara në vendet anëtare të BE-së.

Ministri Lloga shprehu edhe një herë falënderimin e tij për mbështetjen e EURODREJTËSI-së, si rezultat në të cilin bashkëpunimi në aksion të përbashkët të suksesshëm në periudhën e kaluar u shkatërrua grupi kriminel ndërkombëtar.

"Në këtë drejtim, ministri shprehu bindjen se bashkëpunimi i deritanishëm do të intensifikohet edhe më tepër dhe me emërimin e Prokurorit publik për lidhje nga Republika e Maqedonisë së Veriut me angazhimin e drejtpërdrejtë të tij  padyshim se do të rrisë efikasitetin e bashkëpunimit me EURODREJTËSI dhe ballafaqimin me krimin në nivel ndërkombëtar", bëhet e ditur në kumtesë.

Në takim, ministri dhe kryetari i EURODREJTËSI-së diskutuan edhe për mundësitë e mbështetjes së EURODREJTËSI-së për sigurimin  e shembujve të suksesshëm të programeve për shpërndarjen automatike të lëndëve në gjykata në ndonjërin nga shtetet anëtare të BE-së, si një nga prioritete ndaj të cilit është drejtuar Ministria e Drejtësisë në procesin e digjitalizimit  të gjyqësorit.

Në këtë drejtim, ministri theksoi se me kthimin e legjitimitetit në punën e Këshillit Gjyqësor dhe me zgjedhjen  e fundit  të Prokurorit  të ri Republikan Publik janë siguruar dy nga tre parakushtet kyçe për sigurimin e funksionimit të gjyqësorit të pavarur dhe funksional.  

"Ministri potencoi se me vendosjen e digjitalizimit të suksesshëm në gjyqësor  përmes sistemit funksional të ndarjes automatike të lëndëve dhe rrumbullakimin e këtij procesi, Republika e Maqedonisë së Veriut do të arrijë përparim të rëndësishëm në reformën e gjyqësorit e me këtë edhe në sundimin e ligjit", thuhet në kumtesë. fc/

Fotografia: Ministria e Drejtësisë