Shkup, 30 tetor 2024 (MIA) - Në buxhetin e ri fokusi është vendosur edhe në financimin e projekteve ekologjike, për të cilat ende bisedohet dhe mbahen konsultime, thotë zëvendëskryetari i Qeverisë dhe ministër i Mjedisit Jetësor dhe Planifikimit Hapësinor, Izet Mexhiti.

"Ne ende po flasim, po debatojmë, jemi në konsultim me të gjitha ministritë, të gjitha dikasteret. Fokusi është edhe tek Ministria e Ekologjisë, sepse është në agjendën e qeverisë dhe për këtë arsye jemi sot këtu për përgatitjet për COP 29. Pra ku do të shikojmë mundësitë e reja, mundësitë financiare, si të zgjidhim problemin me ndotjen, problemet me të cilat përballemi. Gjithashtu, sa i përket përcaktimeve të VLEN-it gjatë zgjedhjeve, fokusi ka qenë dhe mbetet te decentralizimi, i cili është i rëndësishëm për të gjitha komunat, por edhe për komunat tona. Këtë vit tashmë janë ndarë 100 milionë euro, vitin e ardhshëm 250 milionë euro dhe mendoj se kjo tashmë do të ndihet në të gjitha komunat, sepse do të punohet në probleme dhe zgjidhje konkrete nga të cilat do të përfitojnë qytetarët në komunat. Në fokus është edhe arsimi, jo vetëm me investimin që është planifikuar për kampusin Nënë Tereza, arsimi në përgjithësi është investimi më i mirë dhe do të mbetet në prioritetet tona", tha Mexhiti i pyetur për të komentuar buxhetin e vitit 2025.

I pyetur nëse ka masa konkrete për të pasur ajër më pak të ndotur këtë dimër, ai tha se është një çështje komplekse që kërkon aktivitete komplekse.

"Është një çështje komplekse, që nënkupton një gamë komplekse aktivitetesh, sepse nuk mund të zgjidhet brenda natës. Por është mirë që trendi është një përmirësim në krahasim me periudhën e mëparshme, çdo vit do të thotë që periudha e ndotjes shkurtohet, edhe pse nuk duhet të mjaftohemi me kaq. Prandaj punohet intensivisht, çdo ditë, si ta zgjidhim ngadalë por me siguri, do të thotë me disa masa, duke filluar nga bashkëpunimi me vetëqeverisjen lokale, sepse edhe këto projekte janë 40 për qind të fokusuara në ekologji, disa për infrastrukturën nëntokësore, disa për sipërfaqe të gjelbra. Gjatë kësaj periudhe thuajse çdo javë do t'ju informojmë me aktivitete specifike që do t'i ndërmarrim si Ministri", tha Mexhiti, i cili sot foli në ngjarjen "Në prag të Konferencës së 29-të të Palëve të Konventës së KB-së për Ndryshimet Klimatike - COP29: rritja e ambicieve dhe aksioni mundësues, organizuar nga UNDP. sa/

Foto: MIA