Shkup, 29 mars 2023 (MIA) - Tekste të memorandumeve për mirëkuptim me Qeverinë e Serbisë për masat për përmirësimin e lëvizjes së njerëzve dhe mallrave përmes kufirit të përbashkët shtetëror, dhe për projektin për mbledhjen elektronike të tarifave rrugore - vendosje e sistemit ndërveprues elektronik për pagesën e tarifave rrugore, janë miratuar sot në seancën e Qeverisë.

Qëllimi i Memorandumit për masat për përmirësimin e lëvizjes së njerëzve dhe mallrave, sipas propozuesit, Zyra e kryetarit të Qeverisë, është që bashkërisht të shqyrtohen mundësitë dhe të merren masa për përmirësimin e lëvizjes së njerëzve dhe mallrave përmes kufirit shtetëror ndërmjet Republikës së Maqedonisë së Veriut dhe Republikës së Serbisë, veçanërisht përmes pikës kufitare Preshevë - Tabanovcë.

"Me Memorandum të dyja palët po shqyrtojnë mundësitë për: zgjerimin e rrugëve hyrëse në pikën kufitare, vendosjen apo përmirësimin e sinjalistikës së trafikut, vendosjen e procedurave të reja për kontrollin kufitar për kalimin e përshpejtuar të udhëtarëve dhe kontrollin e njerëzve dhe automjeteve në pikën kufitare", sqarojnë nga Qeveria.

Qëllimi i Memorandumit për projektin e mbledhjes elektronike të tarifave, sipas Ministrisë së Transportit dhe Lidhjeve, është të mbështesë përpjekjet e Qeverisë së Republikës së Maqedonisë së Veriut dhe Qeverisë së Republikës së Serbisë për të kontribuar në përmbushjen e synimet e lëvizjes së lirë të njerëzve, mallrave, shërbimeve, kapitaleve dhe kufijve të hapur, si dhe vazhdimi i zhvillimit, modernizimit dhe integrimit të infrastrukturës rrugore të vendeve të Ballkanit Perëndimor. mb/