Lëvizja Demokratike: Qeveritarët rrisin rrogat e veta në mbi 2.000 euro, për qytetarët vetëm 2.000 denarë rritje
Shkup, 22 shtator 2023
Hipokrizia e pushtetit aktual përfundimisht nuk ka fund. Shpesh ata krenohen me diçka që në fakt është për tu turpëruar.
Ministri i Ekonomisë, Kreshnik Bekteshi e konsideron si arritje të madhe rritjen e pagave minimale për 10% ose 2.000 denarë.
Nga ana tjetër rritja e rrogës për qeveritarët ishte 78% duke arritur vlerë prej 128.000 denarë apo mbi 2.000 euro dhe kjo është tallje me fatin e qytetarit të thjeshtë.
Tashmë të gjithë e dimë se qytetarët janë buzë ekzistencës. Natyrisht, këtë presion të përditshëm nuk e ndjejnë qeveritarët dhe familjet e tyre, sepse ata, pikërisht në kurriz të qytetarëve ia kanë siguruar vetes një përditshmëri të rehatshme.
Ajo që po bën qeveria është vetëm edhe një përpjekje për ta blerë vullnetin e qytetarëve për zgjedhjet e ardhshme.
Por, qytetarët mirëfilli e dinë se qeveria tenton ta shes si sukses rritjen e pagës minimale për 2.000 denarë derisa për veti rrit pagat në vlerë mbi 2.000 euro, e skandalet korruptive nuk kanë të ndaluar.
Lëvizja Demokratike
________________________________________________________________________________________________________________
MIA këto tekste i publikon në formën integrale dhe origjinale dhe nuk mban përgjegjësi për përmbajtjen e tyre dhe as për mangësitë eventuale drejtshkrimore apo gabimet e shtypit.
