Gostivar, 23 nëntor 2024 (MIA) - Sot në Gostivar u hapën zyrat e Lëvizjes Demokratike. Me atë rast, lideri i Lëvizjes Demokratike dhe njëherit zëvendëskryetari i parë i Qeverisë të Maqedonisë së Veriut, Izet Mexhiti, tha se ky moment shënon një tjetër hap të rëndësishëm në rrugëtimin tonë drejt ndërtimit të një alternative politike të fortë dhe përfaqësuese për të gjithë qytetarët.

"Lëvizja Demokratike po fuqizohet çdo ditë, duke krijuar një strukturë solide dhe një vizion të qartë për një të ardhme më të mirë. Kjo është dëshmi e përkushtimit dhe bashkimit të njerëzve që besojnë te ndryshimi, te barazia dhe te përfaqësimi i drejtë i të gjithëve", tha Mexhiti.

Ai theksoi se bashkë forcimin e LD-së, po konsolidohet edhe koalicioni VLEN, si garanci për një politikë që vlen – një politikë që mbështet zhvillimin, drejtësinë dhe mirëqenien për të gjithë qytetarët e Maqedonisë së Veriut.

"Faleminderit të gjithë anëtarëve dhe mbështetësve që e bënë të mundur këtë moment! Forca jonë qëndron në bashkimin dhe vizionin tonë të përbashkët. Gostivari sot tregoi që është pjesë e rëndësishme e këtij vizioni", tha Mexhiti. sa/

Foto: Izet Mexhiti, Fejsbuk