Prishtinë, 16 gusht 2022 (MIA)- Kryeministri i Kosovës, Albin Kurti dhe zëvendëskryeministri përgjegjës për integrimet evropiane dhe kryenegociatori në dialogun me Serbinë, Besnik Bislimi, është takuar sot pasdite me shefin e zyrës së BE-së në Prishtinë, Tomas Shinogi dhe me ambasadorët e të ashtuquajturës “Kuintit”, gjegjësisht pesë vendet perëndimore më me ndikim që kanë misione diplomatike në Kosovë – SHBA, Britania e Madhe, Gjermania, Italia dhe Franca, njofton korrespodenti i MIA-s nga Prishtina. Lajmin e ka bërë të ditur zyra për marrëdhënie me publikun e Qeverisë së Kosovës, duke theksuar se takimi u zhvillua në prag të nisjes së Kurtit në Bruksel, ku të enjten më 18 gusht do të takohet me presidentin e Serbisë, Aleksandar Vuçiq. "Në prag të takimeve në Bruksel, kryeministri i Republikës së Kosovës, Albin Kurti, së bashku me zëvendëskryeministrin, Besnik Bislimi, u takua me përfaqësuesin special të Bashkimit Evropian në Kosovë dhe me ambasadorët e vendeve të Kuintit", thuhet në njoftim. Në takim, njoftoi shërbimi për shtyp i Qeverisë në Prishtinë, u theksua “përkushtimi për bashkëpunim dhe koordinim ndërmjet” Qeverisë së Kosovës dhe përfaqësuesve të BE-së dhe pesë vendeve perëndimore. U diskutua edhe për takimet e ardhshme në Bruksel me ndërmjetësimin e BE-së dhe “proceset dhe çështjet që kanë të bëjnë me dialogun midis Republikës së Kosovës dhe Serbisë”. qa/