Shkup, 24 mars 2025 (MIA) - Komisioni Shtetëror për Parandalimin e Korrupsionit (KSHPK) ka filluar verfikimin kundër korrupsionit të Ligjit për veprimtari gastronomike, Ligjit për mbrojtje dhe shpëtim, Ligjit për mbikëqyrje inspektuese, Ligjit për vetëqeverisje lokale, si dhe ligjeve tjera materiale, me qëllim, siç thonë, të mundësohet zbulimi dhe parandalimi i rreziqeve potenciale nga korrupsioni gjatë zbatimit të procedurave përkatëse të ndërlidhura me dhënien e lejeve dhe licencave për punë, lejet për funksionimin e objekteve hotelierike, si dhe në fushën e mbikëqyrjes mbi to.

Siç njoftoi sot KSHPK, rishikimi i ligjeve kundër korrupsionit si proces nënkupton vlerësim të plotë dhe sistematik të rregulloreve ligjore për të identifikuar mundësitë për keqpërdorime, konflikt të interesit, paqartësitë dhe boshllëqet në ligje që mund të nxisin praktikat korruptive. Njëkohësisht, do të bëhet një analizë dhe vlerësim i plotë i formës dhe përmbajtjes së rregulloreve (ligjeve, akteve nënligjore dhe akteve të tjera të përgjithshme) që janë në përgatitje ose tashmë janë përgatitur nga aspekti i zbatimit praktik të tyre, përputhshmërisë dhe përmirësimit të tyre me qëllim zbulimin, parandalimin dhe minimizimin e rreziqeve në lidhje me mundësinë e korrupsionit dhe konfliktit të interesit që mund të rezultojë në zbatimin e ligjeve.

"Si rezultate kryesore të verifikimit antikorrupsion, presim forcimin e qasjes parandaluese dhe në vend që të reagojmë ndaj praktikave korruptive post-factum, të kemi proaktivitet, gjë që do të mundësojë ligjet të jenë të lira nga rreziqet e korrupsionit. Procedura gjithashtu do të vlerësojë rreziqet dhe do të analizojë dispozita specifike që mund të krijojnë kushte për favorizim, vendimmarrje diskrete ose mungesë të transparencës", thuhet në komunikatë.

Nga KSHPK thonë se do të përfshijnë shumë palë të interesuara përmes bashkëpunimit me institucionet relevante dhe shoqërinë civile, që do të sigurojë pavarësi dhe objektivitet gjatë analizës.

Të gjitha rezultatet, siç theksojnë KSHPK-ja, do të jenë në dispozicion të publikut dhe i gjithë procesi do të jetë transparent dhe publik, ndërsa raportet dhe rekomandimet do t'i dorëzohen Qeverisë dhe Kuvendit, me qëllim të përmirësimit të këtyre ligjeve, duke ndikuar dhe duke mos lënë hapësirë ​​për aktivitete korruptuese. mb/

Foto: MIA