Kovaçevski: Tani për një shportë konsumatore duhen 2,1 paga minimale, në kohën e VMRO-DPMNE-së duheshin 4,5 paga minimale
Shkup, 16 mars 2023 (MIA) - Kur ishte në pushtet VMRO-DPMNE, për një shportë konsumatore nevojiteshin 4,5 paga minimale, ndërsa tani për një shportë konsumatore duhen 2,1 paga minimale. Kemi dyfishuar standardin e punëtorëve që punojnë me pagë minimale, tha kryeministri Dimitar Kovaçevski.
Ai sonte gjatë paraqitjes së tij në ditarin qendror të televizionit "Sitel" u shpreh i kënaqur që zgjidhjet sistemore për harmonizimin e pagës minimale po japin rezultate dhe se me pagesën e muajit mars paga minimale do të jetë 20.175 denarë.
Lidhur me harmonizimin e pagave, Kovaçevski tha se të gjitha pagat janë të harmonizuara në sektorin privat, por nëse diku ka mospërputhje, atëherë çdo punëtor duhet të reagojë. Sa i përket pagave në sektorin publik, kryeministri tha se për këtë duhet të hapet një diskutim me sindikatat që përfaqësojnë punëtorët e sektorit publik dhe se këtu duhet të diskutohet edhe për produktivitetin.
"Një gjë është rritja e pagës, por është tjetër gjë rritja e produktivitetit dhe ofrimit të shërbimeve ndaj qytetarëve, sepse neve që punojmë në sektorin publik, ju nga privati na paguani rrogën, ju prisni kushte më të mira", tha Kovaçevski.
Të hënën, siç paralajmëroi, përfaqësues të Sindikatës do të thirren në Ministrinë e Ekonomisë për shkak se ka mospërputhje në llogaritjen e shportës minimale të konsumit.
"Në kalkulimin e fundit, qoftë për shkak të një mosrespektimi apo ndonjë gabimi teknik, ka një kalkulim të dyfishtë të inflacionit", tha Kovaçevski. ls/
Foto: Qeveria
