Shkup, 5 dhjetor 2025 (MIA) - Në Kavadar nesër në Kongresin e 18-të të VMRO-DPMNE-së pritet të rizgjedhet Hristian Mickoski si lider i partisë, i cili është edhe kandidati i vetëm për këtë pozitë. Në Kongres pritet të marrin pjesë 2,600 veta, prej të cilëve 850-860 delegatë dhe 1,700-1,800 mysafirë, dhe aty duhet të miratohet "Strategjia Maqedonia 2030".

"Në përgjithësi, bëhet fjalë për një dokument që përmban vizionin se si ne, si VMRO-DPMNE, aktualisht parti qeverisëse, dhe shpresojmë edhe gjatë periudhës që përfshin ky dokument deri në vitin 2030 të jetë kështu, e shohim Maqedoninë dhe cilët janë shtyllat mbi të cilat do të ndërtojmë politikën tonë si parti politike dhe si partia më e madhe politike brenda qeverisë", tha dje në brifingun me gazetarët lideri i VMRO-DPMNE-së dhe kryeministri Mickoski.

Sipas tij, ky do të jetë deri tani Kongresi më masiv, do të ketë fjalime nga disa parti si motra. Kongresi do të zhvillohet sipas skenarit të zakonshëm – miratimi i rendit të ditës, zgjedhja e kryesisë punuese që do të udhëheqë ngjarjen, miratimi i Strategjisë Maqedonia 2030, pastaj zgjedhja e komisionit zgjedhor, propozimi ose propozimet për kandidat(e) për kryetar, fjalime nga disa delegatë, si dhe shqyrtimi i raportit për veprimtarinë materiale-financiare të partisë.

Në Kongres do të prezantohet kandidati për kryetar, i cili brenda këtij kuadri do të duhet të japë vizionin për periudhën e ardhshme.

Më pas ndodh vetë votimi, pas të cilit do të ketë raport nga Komisioni Zgjedhor. Do të zgjidhen kryetari dhe anëtarët e komisionit statutorë që propozon kryetari, si dhe të komisionit për mbikëqyrjen e veprimtarisë materiale-financiare. Në fund, në Kongres është parashikuar fjalimi i kryetarit të zgjedhur të partisë.

Mickoski njoftoi se nëse zgjidhet, ky do të jetë mandati i tij i fundit si kryetar i VMRO-DPMNE-së, pasi Statuti i partisë parashikon që një person mund të rizgjidhet për kryetar maksimumi për tre mandate. "Dhe ndërsa unë jam kryetar, për këtë kusht për numrin maksimal të mandateve që një kryetar i VMRO-DPMNE-së mund të ketë, nuk kam ndërmend të mbështes asnjë iniciativë për ndryshimin e kësaj pjese të Statutit", tha lideri aktual i partisë dhe kryeministri Hristijan Mickoski.

Ai thekson se është e rëndësishme të theksohet se për herë të parë si parti politike nuk kanë borxhe. Në vitin 2018, tha ai, situata nuk ishte e lehtë, as parashikimet për VMRO-DPMNE-në, por në këtë moment nuk kemi ekspozim ndaj bankave, nuk kemi borxhe që kushtimisht i kemi pasur në të kaluarën, nënvizoi kryetari i VMRO-DPMNE-së, Hristijan Mickoski, qa/

Foto: arkivi i MIA-s