Shkup, 28 shkurt 2023 (MIA) - Çmimi i bukës së bardhë dhe gjysmë të bardhë nga sot do të ngrihet, ndërsa pas miratimit të këtij vendimi do të arrijë maksimum 33 denarë. Por nëse kjo ndodh, mullixhinjtë njoftojnë se do të ndërpresin prodhimin.

Masën për ngrirjen e çmimit të bukës e ka propozuar Ministria e Ekonomisë pas analizave që tregojnë se shumica e kompanive të industrisë ushqimore, edhe pse kanë marrë energji elektrike të subvencionuar, nuk kanë ulur çmimet e produkteve as pas tre muajsh. Këtë e mohojnë furrtarët dhe pretendojnë se e kanë respektuar plotësisht masën për subvencionimin e energjisë elektrike. Çmimet e bukës, thonë ata, janë ulur më shumë se sa vlera e subvencionit që marrin. Ata paralajmërojnë gjithashtu se nëse ngrihet çmimi i bukës do të pësojnë dëme të mëdha, nga 3.000 deri në 15.000 euro në ditë dhe do të detyrohen të mbyllin objektet e prodhimit.

"Të martën çmimi do të ngrijë dhe nuk do të jetë mbi 33 denarë si për bukën e bardhë ashtu edhe për atë gjysmë të bardhë. Ky është vetëm hapi i parë i produkteve të listuara në vendimin e Qeverisë. Do të pasojnë vendime të reja për ngrirjen e çmimeve. Çmimet nuk do të rriten edhe pas përfundimit të masës, përveç nëse rriten çmimet e lëndëve të para dhe më pas mund të ketë rritje të theksuar të çmimeve", kumtoi të shtunën ministri i Ekonomisë Kreshnik Bekteshi.

Sipas tij, nuk mund të ketë dallim në çmim dhe e njëjta bukë të kushtojë nga 28 deri në 38 denarë.

Bekteshi thekson se kontrolle inspektuese do të kryhen edhe në pjesën e peshës.

"Është konstatuar se disa prodhues dhe tregtarë po ulin çmimet, por në të njëjtën kohë po ulin sasinë e atij produkti. Prandaj, nën 450 gram bukë të bardhë dhe gjysmë të bardhë nuk mund të shitet dhe do të jetë me çmim fiks. Mund të jetë nën këtë, por nuk mund të jetë mbi këtë", tha ministri.

Mullixhinjtë dje kanë mbajtur një mbledhje në Odën Ekonomike dhe kanë arritur në një konkluzion unanim - nëse Qeveria miraton masën për kufizimin e çmimit të bukës, nga e nesërmja nuk do të ketë bukë në treg.

“Ditën kur vendimi për ngrirjen e çmimeve do të publikohet në Gazetën Zyrtare, nga dita e nesërme nuk do të prodhohet bukë dhe të shitet”, ka thënë kryetari i Grupacionit për industrinë e bluarjes dhe furrës", Goran Malishiq.

Ai shpjegoi se në dy muajt e fundit çmimet në treg janë zvogëluar, por ka pasur ndryshime, varësisht nga lloji i bukës dhe pesha, nga 33, 35 deri në 50 denarë.

"Çmimet filluan të ulen ndjeshëm në 30 ditët e fundit. Ekziston një model se si qeveria duhet të vendosë një çmim social për bukën sociale, siç është bërë në Serbi. Është thënë qartë dhe me zë të lartë tashmë dy vjet më parë.  Në Serbi, shteti subvencionon 30 për qind të çmimit të miellit për furrat e bukës për të pasur një çmim të caktuar, të cilin qeveria serbe e ngriti tre ditë më parë. Ka modele, po, është shpenzim, por nëse duam të kemi një çmim social me një çmim në treg, Qeveria duhet ta subvencionojë, nuk mund të jemi ne  kompani me përgjegjësi shoqërore që do të kemi humbje", tha Malishiq.

Me masën për subvencionimin e energjisë elektrike, e cila ka hyrë në fuqi prej tre muajsh, janë përfshirë kompanitë që prodhojnë vaj ushqimor, bukë dhe produkte furre, miell, qumësht dhe produkte qumështi, si dhe industria e mishit dhe shpendëve. sa/

Foto: MIA