Shkup, 20 janar 2026 (MIA) - Njësiti për Korrupsion në Departamentin për Shtypje të Krimit të Organizuar dhe të Krimit të Rëndë sot ngriti kallëzim penal në Prokurorinë Themelore Publike për Ndjekje të Krimit të Organizuar dhe Korrupsionit (PTHP NKOK) kundër G.R. (53) nga Negotina, me banim në Shkup, për shkak të ekzistencës së dyshimit të arsyeshëm për kryerjen e veprave penale "fitim dhe fshehje e paligjshme e pasurisë" sipas nenit 359-a, paragrafi 3, përfshirë paragrafin 1 dhe "pastrim parash dhe të ardhurave të tjera nga veprat penale" sipas nenit 273, paragrafi 1 i Kodit Penal.

"G.R., në cilësinë e personit zyrtar - gjyqtar në Gjykatën e Apelit në Shkup, në periudhën nga 10.02.2020 deri më sot, në kundërshtim me detyrimin ligjor për të raportuar gjendjen e tij pasurore ose ndryshimin e saj, ka dhënë informacion të rremë në lidhje me pasurinë e tij dhe pasurinë e familjes së tij, e cila pasuri tejkalon shumë të ardhurat e tij të ligjshme," theksohet në kumtesën e Ministrisë së Punëve të Brendshme.

Në kuadër të hetimit, më 18 janar 2026, në bazë të një urdhri të lëshuar nga një gjykatës në procedurë paraprake nga Gjykata Themelore Penale e Shkupit, në koordinim me prokurorin publik në fjalë, është kryer një bastisje në shtëpinë e prindërve të tij të vendosur në Negotinë, ku në katin e parë, më saktësisht në kuzhinë, janë vërejtur rrethana të dyshimta për kryerjen e aktiviteteve ndërtimore (korrigjimi i pllakave të murit), pas së cilës, gjatë heqjes së një pllake qeramike muri, është vërejtur një vrimë në të cilën ka pasur rrotulla alumini në formë cilindri, të paketuara në 13 pako të veçanta, në të cilat janë gjetur gjithsej 610 kartëmonedha në vlerë prej 500 eurosh dhe 225 kartëmonedha në vlerë prej 200 eurosh, ose gjithsej 350.000 euro. mb/

Foto: MIA