Shkup, 4 mars 2026 (MIA) - Implementimi i Strategjisë për përfshirjen e romëve është pozicionuar si një prioritet i lartë i Qeverisë. Ky nuk është një detyrim formal programor, por një çështje vlerash, qeverisjeje të përgjegjshme dhe ndërtimit të një shteti në të cilin barazia nuk është vetëm një angazhim, por një realitet - kjo u theksua në prezantimin e sotëm të raportit mbi vlerësimin e zbatimit të Strategjisë për përfshirjen e romëve 2022 - 2030.

Ministri pa portofol përgjegjës për zbatimin e Strategjisë për përfshirjen e romëve, Shaban Saliu, tha se strategjia paraqet një kornizë sistemike për krijimin e një shoqërie të drejtë dhe gjithëpërfshirëse, qasje të barabartë në arsim cilësor, kujdes shëndetësor, sigurime sociale dhe akomodim të denjë.

Analiza e përpiluar nga eksperti, Eben Fridman, sipas ministrit Saliu, tregon rezultatet e arritura, por gjithashtu zbulon fushat në të cilat nevojitet efikasitet më i madh, organizim më i mirë dhe llogaridhënie më e mirë.

"Pres që institucionet kompetente të përfshihen aktivisht në diskutim dhe të konfirmojnë qartë gatishmërinë e tyre për t'i përkthyer rekomandimet në politika konkrete, masa buxhetore dhe afate kohore. Vetëm në këtë mënyrë mund të flasim për implementim real. Do të punojmë për të forcuar bashkëpunimin ndërinstitucional, për të përmirësuar mekanizmat e monitorimit dhe për të vendosur linja të qarta përgjegjësie. Vetëm përmes një qasje sistemike dhe vullnetit të fortë politik mund të sigurojmë rezultate afatgjata", ka thënë ministri Saliu.

Vendi ka bërë përparim konkret në fushën e arsimit, ku në periudhën nga viti 2006 deri në vitin 2025, pothuajse 5.500 fëmijë romë u përfshinë në arsimin parashkollor, ku vetëm vitin e kaluar u regjistruan 526 fëmijë. Në rreth 20 komuna, fëmijët nga familjet në rrezik social janë të përjashtuar nga pagesa e tarifave të pjesëmarrjes, ndërsa në 20 komuna ndërmjetësuesit arsimorë janë angazhuar për të rritur ndërgjegjësimin për arsimin e hershëm.

Një hap i rëndësishëm, sipas ministrit të Politikës Sociale, Fatmir Limani, është bërë edhe në fushën e lëshimit të dokumenteve të identifikimit. Konkretisht, nga 526 persona të regjistruar pa dokumentacion, pothuajse 450 persona tashmë janë pajisur me certifikatë lindje, 150 dokumente personale identifikimi janë lëshuar dhe të tjerët janë në procedurën e lëshimit.

Në fushën e strehimit, Limani njoftoi se ligji për strehimin social duhet të hyjë në procedurën qeveritare këtë muaj. Po vihet re gjithashtu progres në qasjen në kushtet e kujdesit shëndetësor për këta persona, si dhe në fushën e infrastrukturës. 

Foto: MIA