Beograd, 7 qershor 2023 (MIA) - Transporti i mallrave mes Serbisë dhe Maqedonisë së Veriut, i cili bëhet "në dhe nga vendet e treta", me automjete ekologjike, do të liberalizohet nga 1 gushti i këtij viti, respektivisht do të lirohet nga regjimi i lejeve. Që do të thotë - nga 1 gushti, transportuesit në të dy vendet lirisht mund të qarkullojnë pa leje, deklaroi sot ministri serb i Ndërtimtarisë, Transportit dhe Infrastrukturës, Goran Vesiq.

Siç njoftoi korrespondenti i MIA-s nga Beogradi, sipas kumtesës së Ministrisë resore, kjo është rezultat i marrëveshjes së arritur në mbledhjen e Komisionit të përzier Serbi - Maqedoni e Veriut për transport rrugor ndërkombëtar të udhëtarëve dhe mallrave, që u mbajt në Ohër më 5 dhe 6 qershor.

"Është arritur marrëveshje që transporti i mallrave 'në dhe nga vendet e treta', i cili bëhet me automjete ekologjike - automjete të kategorisë 'automjet i gjelbër' dhe më lartë (EURO 2, EURO 3, EURO 4, EURO 5, EURO EEV dhe Euro 6) të hiqet nga regjimi i lejeve, respektivisht të liberalizohet, duke filluar nga 1 gushti i këtij viti. Po ashtu, u liberalizua edhe kargo transporti bilateral dhe kargo transporti në tranzit", tha Vesiq.

Marrëveshja mes dy palëve është bërë në bazë të iniciativës "Ballkani i Hapur" dhe qëllimet janë konfirmuar me Memorandumin për mirëkuptim dhe bashkëpunim për lehtësimin e transportit, eksportit dhe lëvizjes së mallrave në Ballkanin Perëndimor. bsh/

Foto: MIA Arkiv