Shkup, 28 shkurt 2023 (MA) - Në vitin 2022, plotësisht 13 mijë persona, nga të cilët 5 mijë janë fëmijë, do të jenë nën kufirin e varfërisë në këtë vend, si pasojë e efektit të krizës, tregon studimi i prezantuar sot “Efektet e krizës ushqimore dhe energjitike tek fëmijët dhe familjet në Maqedoninë e Veriut”, i përpunuar nga Instituti për Kërkime dhe Politika Ekonomike Fajnens Think, në bashkëpunim me Zyrën e UNICEF-it në Shkup.

Ky vlerësim, siç tha Marjan Petreski nga Instituti Fajnens Think, do të thotë se efekti i krizës është më i fortë tek fëmijët sesa tek grupet e tjera të popullsisë.

"Në studim evidentojmë se fëmijët janë edhe më të rrezikuar kur janë në familje me më shumë se tre fëmijë dhe ku niveli arsimor i prindërve është më i ulët. Kjo është e rëndësishme që intervenimet e politikave të mund të synohen në mënyrë adekuate", tha Petreski para prezantimit të studimit.

Vlerësimi i efektit të masave të qeverisë, të cilat synojnë çmimet dhe mbulimin e amvisërive, tregon se ato zbutën 30 deri në 60 për qind të goditjes së krizës, varësisht se cili tregues merret parasysh dhe cili grup i popullsisë. Por, theksoi Petreski, ky efekt nuk është i vogël. Ana negative është se shumica e masave kanë qenë lineare, që do të thotë se në kushtet e një hapësire të ngushtë fiskale që po ngushtohet edhe më shumë, ajo komponentë lineare do të duhet të zvogëlohet edhe më shumë, tha Petreski.

Është përcaktuar nevoja për masa të mëtejshme që do të synohen rreptësisht, pra do të ndihmojnë segmentet e popullsisë që kanë më shumë nevojë.

"Vlerësojmë se efekti i krizës vazhdon, nuk ka mbaruar, do të jetë prezent gjatë gjithë vitit, por intensiteti është në rënie si pasojë e stabilizimit të lehtë në segmentin e çmimeve dhe disa kompensimeve që do të bëjnë rritjen nominale të të ardhurave, sipas njoftimeve për rritjen e pagës minimale, harmonizimin e pensioneve, ndihmat sociale"..., tha Petreski. sa/

foto MIA