Shkup, 7 janar 2024 (MIA) - Gjykata kryesisht vepron në bazë të dokumentacionit/provave të dorëzuara nga PTHP dhe MPB dhe në bazë të bindjes së lirë gjyqësore, theksojnë nga Gjykata Themelore Penale Shkup pas reagimeve që kanë rezultuar nga vendimet e kundërligjshme të Gjykatës për zhvillimet në M-NAV.

Nga Gjykata Penale theksojnë se opinioni duhet të njoftohet me të dhënat përkatëse për ngjarjen, duke i kushtuar vëmendje fshehtësisë së hetimeve dhe me të vetmin qëllim për të hedhur poshtë të gjitha spekulimet e paverifikuara që po plasohen, të cilat ndikojnë në procedurën e prokurorisë gjyqësore.

"Përkatësisht, është e padiskutueshme se ka ekzistuar një ngjarje nga aspekti penal juridik, andaj për të mundësuar mbarëvajtjen e procedurës penale, përkatësisht hetimin nga prokurori kompetent, gjykata e konsideron të nevojshme sigurimin e prezencës së të dyshuarve. Mirëpo, duhet ditur se urdhri hetimor për ngjarjen konkrete përfshin 8 persona dhe deri më tani propozim për përcaktimin e masave për sigurimin e prezencës, si dhe dëshmi për përfshirjen e tyre, është paraqitur vetëm për katër", thuhet në reagimin e Gjykatës Penale.

Lidhur me ngjarjen penale juridike theksojnë se natyra juridike e veprës nga neni 303 paragrafi 2 i K.Penal që u ngarkohet është se: “Kushdo që kryen vepër që rrezikon ose mund të rrezikojë sigurinë e aeroportit për trafikun ajror ndërkombëtar, duke përdorur një pajisje, substancë ose armë, në mënyrë të paligjshme dhe me qëllim të kryerjes së një akti dhune ndaj një personi në  aeroport për trafikun ajror ndërkombëtar që shkakton ose mund të shkaktojë lëndime të rënda ose vdekje, ose shkatërron ose dëmton pajisjet, objekte ose një aeroplan, i cili është në trafik dhe ndodhet në një aeroport për trafik ajror ndërkombëtar”.

"Në rastin konkret, sipas përshkrimit të dhënë të veprimeve të ndërmarra nga të dyshuarit, dhe në lidhje me provat e dorëzuara në mbështetje të propozimit, në këtë moment nuk rezulton se të dyshuarit i kanë plotësuar plotësisht kushtet e parashikuara në vepër penale, gjegjësisht që me veprimet e tyre mund të shkaktojnë lëndim të rëndë, vdekje, ose shkatërrim ose dëmtim të pajisjeve, objekteve ose aviacion, i cili nuk është në komunikacion, dhe ndodhet në një aeroport për komunikacion ajror ndërkombëtar. Përkatësisht, PTHP Shkup nuk ka dorëzuar asnjë provë – dokumentacion mjekësor për lëndimet e pretenduara të shkaktuara, nuk ka të dhëna për pranimin e kallëzimit penal nga i dëmtuari. Ai nuk është dëgjuar në PTHP të Shkupit, as nuk janë dorëzuar prova nëse vërtet ka ndodhur lëndim i rëndë dhe për çfarë lëndimi bëhet fjalë. Gjithashtu, nuk specifikohet mënyra se si veprimet e ndërmarra kanë shkaktuar ose mund të kenë shkaktuar shkatërrimin ose dëmtimin e pajisjeve, objekteve ose aeroplanit, i cili nuk është në trafik dhe ndodhet në një aeroport për trafik ajror ndërkombëtar", theksojnë nga Gjykata Penale.

Njëkohësisht, sipas kumtesës, sipas inspektimit të jashtëzakonshëm të Agjencisë së Aviacionit Civil (AAC), është konstatuar se nuk ka shkelje apo kërcënim për sigurinë e trafikut ajror, si dhe nuk ka asnjë ngjarje apo incident të rëndë lidhur me zhvillimin e sigurisë së trafikut ajror, siç tha drejtori i Agjencisë - Tomisllav Tuntev.

"Domethënë propozimi i Prokurorit Publik nuk çon fare në drejtim të veprës penale të theksuar. Mirëpo, sipas provave të dorëzuara, rezulton se në rastin konkret, të dyshuarit kanë ndërmarrë veprime të caktuara që duhet të hetohen më tej, por jo në kuadër të veprës së caktuar, për të cilën sipas PThP-së ekziston një dyshim i arsyeshëm. Për këtë arsye, për sqarimin dhe konstatimin e të gjitha fakteve juridikisht relevante në ngjarjen konkrete të ndodhur më 04.01.2024, gjyqtari i procedurës paraprake caktoi masa për sigurimin e pranisë së një lloji më të lehtë", thuhet në njoftimin e Gjykatës Themelore Penale Shkup.

Nga Gjykata Penale po ashtu theksojnë se pas pranimit të ankesës nga PThP Shkup për masat e shqiptuara, Këshilli Penal do të vendosë plotësisht, i cili mund ta konfirmojë apo ndryshojë vendimin.

Më 5 janar të këtij viti, gjyqtari i procedurës paraprake nga Gjykata Penale ka urdhëruar masë kujdesi ndaj katër personave, mes të cilëve Bekim Neziri, ish ministër, këshilltar i drejtorit të M-NAV-së dhe kryetar i degës së BDI-së, të dyshuar për rrezikim të sigurisë së trafikut ajror..Ata së bashku me katër persona të tjerë, të cilët janë në kërkim, më 4 janar kanë hyrë në zyrat e M-NAV-së, ku ka ndodhur një incident.

"Në bazë të nenit 146 paragrafi 1 i LKP, të dyshuarve u ndalohet të largohen nga vendbanimi, përkatësisht vendqëndrimi, detyrimi për t'u paraqitur para një zyrtari të caktuar në gjykatë, konfiskimi i dokumentit të udhëtimit, përkatësisht ndalimi për lëshimin e tij dhe ndalimi për komunikim me të dëmtuarin, si dhe komunikimin e ndërsjellë", njoftoi Gjykata në atë kohë. sa/

Foto: Arkivi i MIA-s