Sofje, 22 maj 2023 (MIA) - Dy partitë më të mëdha politike të Bullgarisë, partia e qendrës së djathtë GERB dhe blloku properëndimor i udhëhequr nga "Ndryshimet vazhdojnë", ranë dakord sot të formojnë një qeveri koalicioni me një kryeministër "me rotacion", duke synuar t'i japin fund qor-sokakut politik në vend i cili ka zgjatur më shumë se dy vjet.

Situata e pasigurt e ka detyruar këtë anëtare të BE-së të shtyjë datën e planifikuar për futjen e euros, ndërsa projektbuxheti për vitin 2023 ende nuk është miratuar. Kjo e pengoi Bullgarinë të tërheqë fondet e BE-së për rimëkëmbjen e vendit pas pandemisë.

Pritet që ish-ministri i Arsimit Nikollaj Denkov nga “Ndryshimet Vazhdojnë” të marrë mandatin për formimin e qeverisë dhe kryerjen e detyrave të kryeministrit për nëntë muajt e parë.

"Situata është jashtëzakonisht e vështirë, tha Denkov, transmeton në gjuhën angleze uebfaqja "Sofia Globe". “Pas pesë zgjedhjesh radhazi është e vështirë të formohet një qeveri e rregullt dhe ekziston rreziku real që të shkojmë në zgjedhjet e ardhshme pa rezultat të qartë.

Ish-komisionerja evropiane Maria Gabriel, anëtare e GERB, do të marrë postin e kryeministrit pas nëntë muajsh, sipas marrëveshjes.

Në zgjedhjet e 2 prillit, partia fituese ishte GERB, e cila fitoi 69 nga 240 vende në parlament, ndërsa blloku i udhëhequr nga partia “Ndryshimet Vazhdojnë” fitoi 64 vende.

Për të arritur zyrtarisht zbatimin e marrëveshjes së koalicionit, Gabriel sot ia ka kthyer mandatin presidentit Rumen Radev që e ka marrë për formimin e qeverisë më 15 maj dhe tani duhet t'ia ndajë Denkovit. Emrat e anëtarëve të qeverisë do t'i shpallë në ditët në vijim. ls/