Shkup, 20 mars 2023 (MIA) - Lidhja më e dobët në përballjen me korrupsionin është sistemi ynë gjyqësor, pres nga gjyqësori një hap përpara, këtë e presin edhe qytetarët, thotë zëvendëskryeministrja për politika të qeverisjes së mirë, Sllavica Gërkovska.

Gërkovska, në përgjigje të pyetjes së një gazetari për koment për mesazhet e Përfaqësuesit të Lartë për Politikë të Jashtme dhe Sigurisë dhe nënkryetar i KE-së Zhozep Borell dhe Komisionerit Evropian për Politikë të Fqinjësisë dhe Zgjerim Oliver Varheji se vendi duhet të fokusohet në përballjen me korrupsionin për progres në integrimet evropiane, nënvizoi se në pjesën e kompetencave të saj është krijimi i politikave për qeverisje të mirë, që përfshin zbulimin e dobësive në sistem dhe gjetjen e rrugëve për tejkalimin e tyre, si dhe koordinimin me institucionet e tjera antikorrupsion në drejtim të rritjes së kapaciteteve të tyre dhe gjithçka çfarë nevojitet për të forcuar aktivitetet e tyre për të luftuar korrupsionin dhe krimin e organizuar.

"Secili institucion në atë sistem ka rolin e vet dhe kam thënë shumë herë, secili prej nesh duhet ta kryejë detyrën dhe obligimin e tij në shoqëri në mënyrën më të përgjegjshme dhe profesionale. Fatkeqësisht, lidhja jonë më e dobët është sistemi gjyqësor dhe shpresoj që më në fund të gjitha mesazhet që marrim nga faktori ndërkombëtar, por edhe nga të gjithë qytetarët në vendin tonë të arrijnë në sistemin gjyqësor dhe të shohim një ndryshim drastik në qëndrimin dhe në mënyrën se si sistemi gjyqësor e trajton luftën kundër korrupsionit dhe krimit të organizuar. Sepse ajo që qytetarët duan të shohin është drejtësia dhe që të gjithë të jenë të barabartë para ligjit. Rolin më të madh në këtë kuptim e ka gjyqësori dhe pres një hap serioz përpara në këtë kuptim, tha Gërkovska, e cila mori pjesë në simpoziumin ndërkombëtar shkencor dhe profesional kushtuar arsimit të lartë dhe teknologjisë digjitale në Universitetin Amerikan të Evropës - FON.

E pyetur për konfliktin e interesit për kompaninë e vëllait të zv.kryeministrit Artan Grubi, e cila ka marrë fonde nga Qeveria, ajo theksoi se pret që kjo çështje të ngrihet dhe të hetohet nga KSHPK, pasi siç thotë ajo, është në kompetencën e tyre.

Për luajtjen e futbollit në zyrat e zv.kryeministrit Grubi, e cila nuk u prit mirë nga publiku, thotë se ajo nuk është ashtu siç duhet të sillen zyrtarët.

Sa i përket rastit në Agjencinë për Rini dhe Sport lidhur me të gjeturat e Entit Shtetëror të Auditimit, Zëvendëskryeministrja sqaroi se të gjeturat e ESHA-s janë shqyrtuar nga Komisioni për burime njerëzore dhe zhvillim të qëndrueshëm dhe se është në procedurë. ls/

Foto: MIA printskrin