Bruksel, 12 mars 2024 (MIA) - Në vitet e kaluara kemi ndryshuar shpejtësinë e qasjes ndaj Ballkanit Perëndimor, por kemi kuptuar se nuk mjafton vetëm të presim që rajoni të na afrohet, deklaroi sot kryetarja e KE-së, Ursula fon der Lajen, në fjalimin e saj në seancën plenare të Parlamentit Evropian në Strasburg kushtuar përgatitjes për Samitin e Bashkimit të planifikuar për më 21 dhe 22 mars.

"Nuk mjafton vetëm të thuash se dera është e hapur. Ne gjithashtu duhet të marrim përgjegjësi dhe të mbështesim rrugën e tyre drejt Unionit tonë në çdo mënyrë të mundshme. Kjo është arsyeja pse ne krijuam Planin tonë të Rritjes për Ballkanin Perëndimor. Kjo është arsyeja pse ne hapëm negociatat e anëtarësimit me Shqipërinë dhe Maqedoninë e Veriut dhe kjo është arsyeja pse u angazhuam të bëjmë të njëjtën gjë me Bosnjën e Hercegovinën", tha Fon der Lajen.

Ajo paralajmëroi se Komisioni Evropian do të marrë një vendim për t'i rekomanduar Këshillit të BE-së fillimin e negociatave me Bosnje e Hercegovinën, e cila siç tha, pas marrjes së statusit kandidat ka bërë hapa mbresëlënës, duke arritur më shumë progres për pak më shumë se një vit sesa për më shumë se një dekade.

Sipas saj, BeH-ja u harmonizua plotësisht me politikën e jashtme dhe të sigurisë të BE-së, miratoi disa ligje kyçe, përmirësoi menaxhimin e flukseve të migracionit, ra dakord të përfshinte në dosjet e brendshme penale vendimet e Gjykatës Ndërkombëtare Penale për ish-Jugosllavinë dhe Komiteti i ri drejtues për ndërtimin e paqes u bë funksional.

Ajo iu referua edhe situatës në Lindjen e Afërt, si temë e dytë përveç zgjerimit, e cila do të jetë në fokus të Samitit të ardhshëm të BE-së, duke theksuar se situata në terrenin në Gazë është më dramatike se kurrë më parë, duke arritur një pikë përfundimtare, kur fëmijë vdesin nga uria dhe për këtë arsye Unioni duhet të bëjë gjithçka që është në fuqi për ta parandaluar atë.

"Ndërsa flasim, një anije po lundron nga Qipro për në Gazën Veriore. Ajo bart llojin më elementar të ndihmës humanitare, e cila është më e nevojshme sot: ushqim, ushqime të zakonshme dhe të thjeshta për popullatën që përballet me një fatkeqësi humanitare. Ky korridor detar është rezultat i një bashkëpunimi të paprecedentë ndërkombëtar, nën udhëheqjen e presidentit (qipriot) Nikos Kristodulides. Ne kemi punuar së bashku jo vetëm me Qipron, por edhe me Emiratet e Bashkuara Arabe, SHBA-në dhe Mbretërinë e Bashkuar", tha Fon der Lajen.

Sipas saj, kur të bëhet plotësisht operativ ky korridor detar do të jetë në gjendje të garantojë një fluks të qëndrueshëm, të rregulluar dhe të fortë ndihme për Gazën.

"Të gjithë e dinë se sa e vështirë është të dërgosh ndihma në Gazë. Të gjitha rrugët duhet të përdoren për të arritur te njerëzit në nevojë. Bashkimi Evropian do të forcojë mbështetjen logjistike në terren dhe do të financojë dhe koordinojë qarkullimin e mallrave evropiane përmes këtij korridori", shtoi kryetarja e KE-së.

Fon der Lajen paralajmëroi gjithashtu se Komisioni Evropian aktivizoi sot Mekanizmin e Mbrojtjes Civile të BE-së për të forcuar mbështetjen për palestinezët, duke kujtuar se këtë vit për ta janë ndarë 250 milionë euro nga fondet e BE-së.

"Por ndihma duhet të arrijë tek civilët që kanë nevojë, ndërsa shpërndarja në terren po rezulton veçanërisht sfiduese. Ne duhet të sigurojmë sigurinë e shpërndarjes së ndihmës në Gazë. Kjo e bën edhe më të rëndësishme punën me ato agjenci që kanë ende një prani në terren, shtoi Fon der Lajen.

Për këto arsye, sipas saj, pavarësisht akuzave serioze kundër stafit të UNRVA-s për pjesëmarrje në sulmet e Hamasit ndaj Izraelit, KE vendosi të vlerësojë vendimet e financimit pasi OKB-ja kreu një hetim të brendshëm dhe krijoi një grup të pavarur monitorues, ndërsa Agjencia ra dakord për rishikim nga ekspertë të jashtëm të emëruar nga Bashkimi Evropian.

"Si rezultat, ne do të vazhdojmë me pagesën prej 50 milionë eurosh për të mbështetur UNRVA-n. Këstet e ardhshme do të lëshohen sapo Agjencia të ndërmarrë hapat e tjerë për të cilët kemi rënë dakord së bashku", tha Fon der Lajen.

Ajo përsëriti se Izraeli ka të drejtë të mbrohet dhe të luftojë kundër Hamasit, por mbrojtja e civilëve duhet të sigurohet në çdo kohë në përputhje me ligjin ndërkombëtar.

Foto: EBS