Shkup, 10 gusht 2023 (MIA) - Prej disa muajsh, pacientët me fibrozë cistike kanë mbetur pa ilaçin "kreon 25.000" i cili ndihmon trupin të absorbojë më lehtë ushqimin. MIA tashmë ka shkruar për këtë problem  me të cilin përballen personat me këtë sëmundje të rrallë, ndërsa nga Ministria e Shëndetësisë na është thënë se nga e hëna (7 gusht) ilaçi do të jetë në dospozicion në barnatore.

"Sipas informacionit nga shpërndarësi i ilaçit "kreon 25.000" në vijim është shpërndarja në barnatore dhe tashmë nga e hëna do të jetë i arritshëm për të gjithë pacientët. Bëhet fjalë për ilaç me origjinë biologjike, i cili është në prodhimtari të kufizuar në nivel botëror dhe kështu është shfaqur një deficit afatshkurtër me importin e këtij ilaçi, i cili tashmë është tejkaluar", theksohej në përgjigjen me shkrim  të Ministrisë së Shëndetësisë të premten e kaluar.

Por, tashmë në ditën e katërt pacientët thonë se ilaçi ende nuk është në barnatore. Nga shpërndarësi i këtij medikamenti na ishte thënë se ka mbërritur dhe u është dorëzuar shitësve me shumicë,  por ata nuk e dinë se në cilat barnatore e dërgojnë dhe "nuk e dërgojnë direkt në barnatore". MIA edhe sot i është bashkuar "hetimit" për këtë ilaç, ndërsa në barnatoret ku u paraqitëm dhe atje ku personalisht shkuam në kryeqytet dhe u interesuam, na thanë se nuk e kanë dhe se nuk dihet se kur do të mbërrijë.

"Sipas informacioneve të fundit të marra nga prodhuesi - shpërndarja e "kreon 25,000" është ende në proces. Ilaçi nuk mbahet nga çdo farmaci, dorëzohet me kërkesë të farmacisë, në varësi të nevojave për ilaçin. Sasitë e importuara janë të kufizuara, si në vendet e tjera të rajonit, për shkak të mungesës së komponentit aktiv. Gjatë kësaj periudhe “Kreon 10.000" është vazhdimisht në qarkullim", thanë sot për MIA-n nga Ministria e Shëndetësisë.

Mungesën e këtij ilaçi e konfirmoi edhe kryetarja e Asociacionit për Fibrozë Cistike", Ivana Atanasoska.

"Pacientët nga Tetova, Kumanova, Ohri, Prilepi dhe Shtipi thonë se  nuk gjendet ilaçi "kreon 25.000", tha Atanasoska për MIA-n.

Pasiqë nuk ka "kreon 25.000" gjegjësisht ilaç të destinuar për të rriturit, ata detyrohen të marrin ilaçin e destinuar për fëmijë, "kreon 10.000".

"Enzimat e pankreasit mungojnë për disa muaj ose pacientët gjejnë vetëm një deri në tre kuti në muaj, dhe varësisht nga ushqimi, njerëzit marrin deri në shtatë kuti në muaj", thotë Atanasoska.

Kryetari tjetër i Asociacionit për fibrozë cistike, Fiki Gaspar, në një deklaratë për MIA-n beson se nuk është e përshtatshme të ketë ngecje në furnizimin e ilaçeve të nevojshme për çdo pacient.

"Nuk guxon të ketë ngecje. Besoj se personat përgjegjës që i furnizojnë duhet të planifikojnë me kohë se kur duhet të vijë furnizimi i ri, kur do të konsumohet ai tashmë i blerë", nënvizoi Gaspar, duke apeluar për shpërndarje adekuate të barnave, pa deficit.

Pacientët me fibrozë cistike thonë se duke marrë "trikafta", një medikament për të cilin edhe ata kanë nevojë, u kthehet fryma, marrin frymë më lehtë, nëse nuk marrin "kreon", ushqimi nuk absorbohet në organizëm.

"Ti fut diçka në gojë, përtyp, por nuk të vjen për të ngrënë. Por ky nuk është problemi më i madh. Ke dhimbje stomaku, ngërçe dhe ushqimi ju mbetet i patretur dhe kjo sjell një sërë problemesh të tjera", thotë një pacient me fibrozë cistike, kur e pyetëm se çfarë do të ndodhte nëse nuk merrte "kreon" para vaktit.

Pamundësia për të marrë "kreon 25,000" është vetëm një nga problemet e shumta me të cilat përballen personat me këtë sëmundje të rrallë. sa/

Foto: MIA