Shkup, 26 janar 2024 (MIA) - Edhe partitë në pushtet edhe opozita paralajmërojnë fitore në zgjedhjet parlamentare të 8 majit, ndërsa atmosfera parazgjedhore nxehet edhe më shumë para zgjedhjes së qeverisë teknike të dielën, më 28 janar. Për momentin, zgjedhjet presidenciale janë në hijen e momentit aktual. Në një ngjarje në Shkup, ambasadori evropian Dejvid Gir u kujtoi partive politike se duhet tl ofrojnë një zgjedhje të qartë elektoratit, për të parandaluar polarizimin dhe dezinformimin.

"Çdo parti politike ka të drejtë të vendosë se si do të dalë në zgjedhje. Por më 8 maj LSDM-ja do të formojë qeveri me vizion të qartë evropian që do ta çojë vendin në BE deri në vitin 2030, theksoi mbrëmë kryeministri në dorëheqje Dimitar Kovaçevski.

Presim, shtoi ai, që në zgjedhjet e ardhshme parlamentare të kemi mbi 61 deputetë dhe të formojmë qeverinë e re pro-evropiane.

Kovaçevski thekson se anketa më e mirë vjen në ditën e zgjedhjeve dhe pret që në zgjedhjet e ardhshme parlamentare të ketë mbi 61 deputetë.

"Anketa më e mirë vjen gjithmonë në ditën e zgjedhjeve. Kështu ishte edhe në vitin 2020, kur VMRO-DPMNE tregonte anketa ku kishte avantazh prej 7 për qind dhe në fund i humbi zgjedhjet. Dhe nëse shikoni anketat, qytetarët mund të kuptojnë se demokracia në vendin tonë është përmirësuar në mënyrë drastike në krahasim me vitin 2016. Qytetarët në anketat tregojnë qartë se Qeveria ka futur metodologji korrekte për rritjen e pagave dhe pensioneve. Pres që në zgjedhjet e ardhshme parlamentare të kemi mbi 61 deputetë dhe të formojmë qeverinë e re pro-evropiane. LSDM me partnerët e koalicionit dhe partnerët e koalicionit me të cilët formojnë qeverinë mund të ketë mbi 70 deputetë. Vizioni për një Maqedoni evropiane është i përbashkët për të gjithë ne në këtë koalicion qeveritar", tha ai.

Nëse koalicioni do të jetë nga partnerët tradicionalë të koalicionit me të cilët LSDM do të shkojë në zgjedhje, apo do të jetë një koalicion më i gjerë, Kovaçevski thekson se do të varet nga analizat e bazuara në të dhënat empirike dhe në aspektin e harmonizimit të objektivave programore dhe ofertës kadrore.

Kovaçevski zbuloi se deri më tani nuk ka biseduar me opozitën shqiptare për një kandidat për president të vendit dhe se përveç Pendarovskit, Shekerinskës dhe Spasovskit, "qarkullojnë" emra të tjerë, por që do të diskutohet dhe vendoset në parti dhe me partnerët e koalicionit.

Deputeti dhe anëtar i Komitetit Ekzekutiv të VMRO-DPMNE-së Antonio Milloshoski mbrëmë në një intervistë televizive tha se sipas anketave dhe sondazheve nga terreni, VMRO-DPMNE do të ketë afërsisht dy herë më shumë deputetë në krahasim me LSDM-në.

"Kjo do të thotë se VMRO-DPMNE do të jetë në gjendje të zgjedh partner koalicioni në bazë të asaj që do të ofrojmë si përcaktime programore për përmirësimin e gjendjes në Maqedoni", shpjegoi Milloshoski.

Ai shtoi se qëllimi politik i VMRO-DPMNE-së është që të ketë mbështetje serioze qytetare zgjedhore që të jetë e pavarur dhe të formojë qeveri pa BDI-në.

"Dhe për këtë mendoj se personazhet si Talat Xhaferi, Ramiz Merko, Artan Grubi e të tjerë nuk do të kishin vend në asnjë qeveri, theksoi Milloshoski.

Ai beson se ministrat nga VMRO-DPMNE nuk do ta kenë të lehtë në qeverinë teknike dhe se janë aty për të siguruar një proces më të mirë zgjedhor, jo për t'i dhënë legjitimitet BDI-së dhe LSDM-së, por që BDI dhe LSDM të hyjnë në histori sa më shpejt të jetë e mundur sipas vullnetit të zgjedhësve.

Për votimin e qeverisë teknike, Milloshoski theksoi se Xhaferi nuk e meriton të votohet sepse deri më tani në Kuvend ka treguar se për të nuk vlen as rregullorja e as ligjet. Ministrat teknikë do të marrin pjesë në seancat e Qeverisë.

Lideri i partisë Aleanca për Shqiptarët, Arben Taravari, për një koalicion të mundshëm në zgjedhjet e ardhshme me BDI-në, në një ngjarje në Gostivar është përgjigjur se qëndrimi përfundimtar do të dihet për disa ditë. Edhe pse ai personalisht nuk e dëshiron, megjithatë, siç tha ai, do të respektojë qëndrimin përfundimtar partiak.

"Së shpejti do ta shpallim qëndrimin tonë, duke qenë se jemi të shtyrë nga afatet. Unë besoj se do të ketë një vendim javën e ardhshme. Kemi një vendim të kryesisë së partisë që është aktual, por kuvendi i partisë mund të marrë një vendim tjetër. Para katër muajsh kemi thënë se do të shkojmë vetë në zgjedhje, por do të shohim rrethanat, po dëgjojmë edhe rekomandimet. Vendimi përfundimtar merret në Kuvend, i cili mund të konfirmohet ose jo. Do ta respektoj vendimin, si gjithmonë më parë", tha Taravari.

Sipas parashikimeve të tij, për këtë pyetje do të ketë një përgjigje në katër deri në pesë ditët e ardhshme.

Ambasadori evropian Dejvid Gir dje në një ngjarje në Shkup tha se narrativa është që të ketë zgjedhje të mira demokratike në Maqedoninë e Veriut, se dosja e kaluar zgjedhore ishte shumë e suksesshme dhe se ai shpreson që partitë e ndryshme politike dhe kandidatët e ndryshëm do të ofrojnë një zgjedhje për elektoratin.

"Absolutisht duhet të parandalojmë atë polarizim dhe dezinformim dhe të punojmë në procese zgjedhore paqësore, bashkëpunuese që do të jenë një histori suksesi, pavarësisht se kush i fiton zgjedhjet", tha Gir në ngjarjen organizuar nga Lëvizja Evropiane ku u prezantuan prioritetet e presidencës belge me BE-në nga ambasadori i Belgjikës në Maqedoninë e Veriut me seli në Sofje", Frederik Meris.

Gir theksoi se shumë nga prioritetet e presidencës belge janë gjithashtu shumë të rëndësishme në Maqedoninë e Veriut, siç është mënyra se si e trajtojmë tranzicionin e gjelbër, sundimin e ligjit, tranzicionin social.

"Zgjedhjet do të çojnë në formimin e një qeverie të re dhe ajo do të duhet të përballet me të gjitha këto prioritete dhe sfida. Qytetarët do të presin rezultate në përballjen me luftën kundër korrupsionit, sundimi i ligjit, reforma në administratën publike do të jetë problemi kryesor i çdo qeverie që do të vijë. Kemi disa udhërrëfyes për reformat në gjyqëso, reformat në administratën publike dhe shtetërore, kemi një raport nga skriningu, ku janë zbuluar probleme të ndryshme, si dhe një mision vlerësues nga KE. Të gjitha këto janë pritshmëri që duhet të çohen përpara", theksoi Gir.

Ambasadori evropian theksoi sërish se është absolutisht e nevojshme të fokusohemi tek reformat në vend.

Ai vuri në dukje se çdo shtyrje në rrugën e integrimeve evropiane të Maqedonisë së Veriut ka pasoja për vendin dhe rajonin, dhe veçanërisht të rrezikuara janë arritjet e deritanishme të vendit, në të cilat ka investuar bashkësia ndërkombëtare. ls/

Foto: Arkivi i MIA-s