Tetovë, 11 janar 2024 (MIA) - Dy personat që u plagosën rreth orës 18 para spitalit të Tetovës janë transferuar në Qendrën Klinike në Shkup, informojnë për MIA-n nga spitali i Tetovës. Sipas informacioneve fillestare bëhet fjalë për dy vëllezër nga fshati Gajre.

 SPB Tetovë informoi  se rreth orës 18 e pesë minuta është raportuar të shtëna para hyrjes së Qendrës Urgjente në Spitalin Klinik të Tetovës, gjatë së cilës dy persona nga fshati Gajre i Tetovës, kanë pësuar lëndime me armë zjarri.

 "Shërbimet e SPB Tetovë dhe prokurori publik janë në vendngjarje dhe po ndërmerren masa për gjetjen e pesë personave, të cilët dyshohen në lidhje me rastin. Ndryshe, këtij rasti sot, gjithashtu,  i ka paraprirë edhe një përleshje fizike në mes të njërit prej të plagosurve dhe njërit prej të dyshuarve për pjesëmarrje në të shtënat", informon SPB Tetovë.

Punohet në zbardhjen e rastit, informojnë nga SPB Tetovë.