Shkup, 11 dhjetor 2024 (MIA) - Ministrja e Financave Gordana Dimitrieska-Koçoska, pret që viti 2024 të përmbyllet me rritje shumë më të lartë sesa ishte projektuar, borxhi publik të jetë më i ulët, realizimi i investimeve kapitale në vitin e ardhshëm do të jetë i lartë dhe të realizohen edhe të ardhurat e planifikuara në buxhet. Kjo u theksua nga ministrja e Financave Gordana Dimitrieska-Koçoska, në studion e hapur të RTM-së me temën “Buxheti 2025”, së bashku me Kryeministrin Hristijan Mickoski dhe komunitetin e biznesit. 

“Do të kemi normë shumë më të lartë të rritjes ekonomike dhe borxh publik më të ulët, i cili do të jetë nën 62.7% në fund të këtij viti dhe 62.1% në fund të vitit të ardhshëm”. Duke marrë parasysh korrigjimet në rritje të PBB-së për vitet 2024 dhe 2025, kjo do të thotë se borxhi publik do të jetë më i ulët se 62.1%. Me këtë treguam se po punojmë dhe se kur jemi të përkushtuar konsolidohemi shumë më shpejt”, theksoi ministrja. 

Siç bëri të ditur Ministria e Financave, ajo nënvizoi se vitin e ardhshëm do të ketë realizim të lartë të investimeve kapitale, duke e mbështetur atë me aktivitetet që kryhen në terren, si dhe me aktivitetet në projekte që paraprakisht kanë pasur realizim të ulët.

Ajo potencoi se përveç harmonizimit të ligjeve me direktivën evropiane për tatimin minimal global, nuk do të ketë ndryshime të normave tatimore në vitin e ardhshëm dhe kjo nuk parashikohet as në Buxhetin e vitit 2025 dhe as në Strategjinë fiskale.

“Fokusi ynë do të jetë tek ekonomia gri dhe kështu nuk duhet të rezultojë frika sa i përket të ardhurave të të ardhurave. Hapësira në ekonominë gri është e madhe, e cila sipas disa të dhënave jozyrtare është rreth 40% dhe kemi mundësi që me anë të ligjeve t'i inkasojmë ato. Pak ditë më parë u publikua tenderi për e-faturën, nga ku pritet arkëtim më serioz i TVSH-së, koordinim dhe komunikim më i madh ndërmjet institucioneve – DAP-i, Drejtoria Doganore, Policia Financiare, pikërisht për evidentimin e mangësive të sistemit dhe eliminimin e të gjitha ato veprimeve të kompanive në zonën gri”, theksoi ministrja. 

Ajo shtoi se, deri më tani, nuk ka pasur harmonizim të të dhënave ndërmjet Drejtorisë Doganore dhe Drejtorisë së të Ardhurave Publike dhe buxhetit i është bërë dëm përmes kthimit të TVSH-së, me ç’rast është bërë kontroll dhe në bazë të kësaj janë keqpërdorur së paku 2 miliardë denarë nga mjetet buxhetore.

Ministrja theksoi se çështjet janë detektuar, analizuar në detaje dhe se duhet kohë për t’i zgjidhur problemet e pazgjidhura prej vitesh.

 Foto: Ministria e Financave