Shkup, 8 mars 2024 (MIA) - Një sistem i menaxhimit me rreziqet dhe një depo e të dhënave do të lejojë që të mblidhen më shumë të ardhura në buxhet, që do të thotë më shumë para për spitalet, projektet e infrastrukturës dhe shkollat, si dhe shtypjen e krimit të organizuar. Këtë e theksoi në konferencën e sotme për media në Drejtorinë doganore, drejtori Stefan Bogoev, i cili së bashku me drejtorin e Doganave koreane, Kbanghio Ko, zyrtarisht shënuan fillimin e projektit për implementimin e sistemit të menaxhimit të rrezikut dhe depos së të dhënave, me 4,8 milionë dollarë grant nga Republika e Koresë.

"Në periudhën e kaluar, së bashku me ekspertë nga doganat koreane, kemi punuar në një analizë gjithëpërfshirëse të rreziqeve dhe në përputhje me rrethanat, janë zbuluar nevojat specifike të Drejtorisë doganore, të cilat duhet të mbulohen gjatë implementimit të sistemit", tha ai.

Bogoev sqaroi se, konkretisht, zbatimi i këtij sistemi do të mundësojë përmirësimin e menaxhimit të rrezikut, shënjestrimin më të mirë të deklaratave në të cilat ekziston rreziku i pagesës së detyrimeve në një shumë më të ulët se çmimi real i mallit, rreziku i klasifikimit të gabuar doganor ose rreziku i raportimit të gabuar të origjinës së mallrave.

"Është e rëndësishme të theksohet se vendimi për dhënien e një granti prej 4,8 milionë dollarësh për implementimin e një sistemi të tillë vjen pas një analize trevjeçare të doganave të Maqedonisë, pas së cilës Qeveria e Republikës së Koresë mori vendim që si udhëheqës në rajon, granti duhet të ndahet pikërisht për Doganën e Maqedonisë", nënvizoi drejtori.

Ai falënderoi Drejtorinë Doganore të Koresë për përkushtimin e tyre në zhvillimin e Drejtorisë sonë Doganore.

"Ne kemi vendosur zyrtarisht marrëdhënie diplomatike me Korenë që nga viti 2019 dhe ky projekt ka për qëllim forcimin e këtyre marrëdhënieve. I uroj ekipit të projektit nga pala koreane dhe ekipit tim një punë të suksesshme që duhet të rezultojë në një ngjarje gjatë së cilës sistemi do të promovohet zyrtarisht", shtoi Bogoev.

Kvanghio Ko sqaroi se projekti financohet nga ODA, Zyra e Ndihmës për Zhvillimin e Koresë dhe theksoi se është i rëndësishëm sepse është hera e parë që Dogana e Koresë zbaton një sistem të doganimit elektronik në rajonin evropian.

"Ky sistem do të rrisë efikasitetin e punës dhe do të lehtësojë logjistikën në Maqedoninë e Veriut përmes menaxhimit të integruar të informacionit të burimeve dhe rreziqeve. Ne presim që ajo të kontribuojë në integrimin e suksesshëm të vendit në BE. Përveç projektit, shpresojmë që në takimin e parë të sotëm të drejtorëve të dy doganave të zgjerojmë bashkëpunimin në fusha të ndryshme, duke përfshirë nënshkrimin e marrëveshjes për ndihmë reciproke në çështjet doganore dhe të ndërtojmë bashkëpunim të fortë", nënvizoi ai.

Me ç'rast theksoi se Dogana Koreane do të japë të gjitha përpjekjet jo vetëm për zbatimin e suksesshëm të projektit, por edhe për thellimin e bashkëpunimit për zhvillimin e ndërsjellë. sa/

Foto: MIA